Այս շաբաթ լրացել է ՀՀ նախագահ Վահագն Խաչատուրյանի պաշտոնավարման 100 օրը: Այդ կապակցությամբ Հանրային հեռուստաընկերության հաղորդավար Պետրոս Ղազարյանը հարցազրույց է ունեցել ՀՀ նախագահի հետ: Ի թիվս մի շարք հարցերի ՀՀ նախագահն անդրադարձել է «Ընդերքի մասին օրենսգրքում լրացումներ և փոփոխություններ կատարելու մասին» վիճահարույց օրենքի՝ իր կողմից ստորագրելու հանգամանքին: Նա, մասնավորապես, ասել է.
«Վերջերս բավականին հետաքրքրության արժանացավ Ընդերքի մասին օրենքի փոփոխությունը: Եվ հասարակական կազմակերպությունները դիմել էին ինձ: Ես փորձեցի խորանալ խնդրի մեջ և՛ առաջին ընթերցումից հետո, և՛ երկրորդ ընթերցումից հետո: Ինձ մանրամասն հետաքրքրում էր քննարկումները հանրային տիրույթում ինչպես են տեղի ունեցել, այդ թվում Հանրային հեռուստաընկերությամբ այդպիսի քննարկում էր եղել: Արդյունքում պարզեցինք, Ազգային ժողովի հանձնաժողովի փոխնախագահն էր Բաբկենը Թունյան և կառավարության փոխնախարարն էր ինձ մոտ՝ պարոն Հարությունյանը, քննարկումներ արեցինք, տեսակետները լսեցինք: Ես հասկացա, որ իրականում ամեն ինչ արվել է, հնարավորությունը տրվել է հասարակական սեկտորին կամ ներկայացուցիչներին՝ ոչ կառավարական, որպեսզի իրենք իրենց տեսակետները հայտնեն: Եվ այդ ամենը համադրելով՝ մենք եկանք այն եզրակացության, որ օրենքը հակասահմանադրական չէ, օրենքում հաշվի է առնված բոլոր այն կարծիքները, որոնք հնչել են մինչ օրենքն ընդունելը: Հասարակական կազմակերպությունները որոշակի տարաձայնություն ունեն, բայց այդ տարաձայնություններն ընդամենն իրենց տարաձայնություններն են իրենց ներկայացմամբ: Բայց օրենքի և սահմանադրականության առումով որևէ խնդիր չկար»:
Նշենք, որ «Ընդերքի մասին օրենսգրքում լրացումներ և փոփոխություններ կատարելու մասին» օրենքի նախագծի վերաբերյալ հանրության հետ հանրային լսումներ չեն կազմակերպվել ընդունված կարգի համաձայն: Իրավական ակտերի նախագծերի հրապարակման միասնական հարթակում տեղադրված օրինագծում բացակայել են հասարակական կազմակերպությունների համար վիճահարույց դրույթները, որոնք կարող էին քննարկվել նաև այդ հարթակում: Հանրային հեռուստաընկերության եթերում օրինագծի քննարկումը հանրային լսում չէ: Այսպիսով, օրենքն ընդունվել է՝ արհամարհելով չորս տասնյակից ավելի հասարակական կազմակերպությունների դիմում-նամակները:
ՀՀ Սահմանադրության 129-րդ հոդվածի համաձայն՝ Սահմանադրությանն օրենքի համապատասխանությունը որոշելու հարցով ՀՀ նախագահը 21-օրյա ժամկետում դիմում է Սահմանադրական դատարան: Եթե Սահմանադրական դատարանը որոշում է, որ օրենքը համապատասխանում է Սահմանադրությանը, ապա Հանրապետության նախագահը հնգօրյա ժամկետում ստորագրում և հրապարակում է օրենքը:
Հունիս 23, 2022 at 16:38