Երկրաբանը համոզված է, որ Սեւանա լճի ավազանում նավթ չեն գտնի

Երկրաբանը համոզված է, որ  Սեւանա լճի ավազանում նավթ չեն գտնի

ԷկոԼուր

Երկրաբանական գիտությունների դոկտոր Հրաչյա Ավագյանը համոզված է, որ Սեւանա լճի ավազանում նավթ չեն գտնի: «Սևանի ողջ ավազանը հանքային ծագման ապարների և մակերես դուրս եկող լավային ապարների օջախներ են: Ես չեմ կարծում, որ նավթի անգամ մեկ երևակում կլինի այնտեղ: Դեռևս խորհրդային իշխանության տարիներին Հայաստանի տարածքում 108-110 հորատանցք են ծակել նավթ որոնելու նպատակով, բայց Սևանի ավազանի մասին խոսք անգամ չկար: Նավթի մասին նույնիսկ ավելորդ է խոսել: Ես համոզված եմ, որ չեն գտնի», - ԷկոԼուրի հետ զրույցում ասաց Հրաչյա Ավագյանը:

Սեւանա լճի ավազանում`ձկնորսությամբ զբաղվող Հայրավանք, Ծաղկաշեն, Նորատուս գյուղերի տարածքներում, նավթ եւ գազ պատրաստվում է որոնել «Բլեքսթերզ էներջի Արմենիա» ՍՊԸ-ն: Ընկերության ներկայացրած նախագծի հասարակական լսումները տեղի ունեցան սույն թվականի հունվարի 30-ին` Գավառ քաղաքում:  Ազդակիր համայնքներից լսումների մասին տեղյակ էին միայն Ծաղկաշենում. համայնքապետարանի երկու ներկայացուցիչ է մասնակցել լսումներին: «Լավ կլինի, որ նավթ և գազ լինի, կփրկվի մեր գյուղը», - ԷկոԼուրի հետ հեռախոսազրույցում ասաց Ծաղկաշենի համայնքապետ Սերյոժա Սարգսյանը: Իր համայնքի տարածքում նավթ գտնելուն դեմ չէր նաեւ Նորատուսի համայնքապետ Մուրադ Հարությունյանը. «Ինչ վատ է, հարուստ գյուղ կլինի»: Միայն Հայրավանքի համայնքապետ Դավիթ Բադոյանը մտահոգվեց.  «Ցանկալի կլինի, որ մեր վարելահողերի տարածքում չլինի»:

Սեւանի ավազանում նավթ որոնելու հանգամանքը անհանգստություն է առաջացրել հասարակայնության շրջանում: «Այդ կազմակերպությունն արդեն երկար տարիներ աշխատում է Հայաստանում, զբաղվում է նավթի և գազի որոնումներով: Դա մեզ համար նորություն չէ, բայց որ պետք է Սևանի տարածաշրջանում լինի՝ ապշեցուցիչ է: Սևանա լիճը պաշտպանվում է «Սևանա լճի մասին» ՀՀ օրենքով: Հիմա մենք ի՞նչ է, կրկին օրենք ե՞նք ուզում խախտել»,-ասաց Էկոլոգիական հասարակական դաշինքի համակարգող Սիլվա Ադամյանը: Նա նշեց, որ կա մտադրություն ԱԺ Գյուղատնտեսական եւ բնապահպանական հարցերի  մշտական  հանձնաժողովում կազմակերպել լսումներ այդ հարցի շուրջ:

Փետրվար 11, 2015 at 14:41


Առնչվող նյութեր


Կատեգորիա

ավելին
պակաս

Մարզեր