ՀՀ ԳԱԱ Արմեն Թախտաջյանի անվան բուսաբանության ինստիտուտի Երևանի բուսաբանական այգին ոռոգման նոր ցանց կունենա: Այն կկառուցվի այգու տարածքում «Կյանքի պուրակ» նախագծի իրականացման շրջանակներում: Այս կապակցությամբ օգոստոսի 4-ին ՀՀ կառավարությունն ընդունեց համապատասխան որոշում:
Որոշման նախագիծը ներկայացնելով՝ ՀՀ տարածքային կառավարման և ենթակառուցվածքների նախարար Գնել Սանոսյանն, դիմելով ՀՀ վարչապետին, ասաց. «Հուլիսի 18-ին Ձեզ մոտ տեղի ունեցավ «Կյանքի պուրակի» նախագծի քննարկումը, որտեղ, ի թիվս մի շարք հանձնարարականների, հանձնարարական եղավ ոչ միայն «Կյանքի պուրակի» 35 հա ընդգրկող տարածքը, այլև ամբողջ Բուսաբանական այգու 80 հա տարածքը ապահովել ոռոգման համար անհրաժեշտ ջրով: Այդ հանձնարարականի շրջանակներում հիմա բերել ենք նախագիծ, որով առաջարկվում է ջրագիծն անցկացնել մինչև Բուսաբանական այգի, որով արդեն 2-րդ փուլում արդեն ամբողջ Բուսաբանական այգու տարածքում կանցկացվի համապատասխան ցանց և կապահովի ջրով: Մոտ 1,5 կմ երկրարությամբ ջրագծի մասին է խոսքը, որը Սարկավագի փողոցից պետք է սկսվի և հասնի Բուսաբանական այգի: Ամբողջ ծրագրի արժեքը 245 միլիոն դրամ է: Քանի որ նախագծով նախատեսված է 200 օր իրականացման համար, մենք քննարկումների արդյունքում հանգել ենք նրան, որ հիմա կարելի է կեսը պլանավորել այս տարվա համար, …Բյուջեից գումար տրամադրելու կարիք չկա: Ոռոգման ցանցի առողջացման ծրագիր ունենք, որտեղ որոշակի խնայված գումարներ կան, և այս տարի 122 միլիոն դրամ այդ ծրագրին կուղղենք»:
ՀՀ վարչապետ Նիկոլ Փաշինյանն այս առնչությամբ, մասնավորապես ասաց. «Երբ տարածք էինք փնտում «Կյանքի պուրակի» համար, մեզ ասվեց, որ Բուսաբանական այգում մոտ 30 հա ամայի տարածք կա, որը չորացել է ժամանակի ընթացքում չխնամվելու բերումով: Հետո քննարկումների արդյունքում պարզվեց, որ իրականում ամբողջ Բուսաբանական այգին է, կամ մեծ մասն է այդ վիճակում, ինչը մեզ համար անակնկալ էր: Եվ մենք հասկացանք, որ իրականում, «Կյանքի պուրակի» գաղափարն օգտագործելով, պետք է վերակենդանացնենք ամբողջ Բուսաբանական այգին և ծրագրի մասշտաբներն ընդլայնենք: …Երբ ծրագիրն իրականացնենք, նա Երևանի համար շատ մեծ էկոլոգիական նշանակություն կունենա, և համայնքային կյանքի կազմակերպման համար շատ մեծ նշանակություն կունենա և մեր նահատակների, ընկած զինվորների, եղբայրների, սպաների հիշատակի ընդգծման մի նոր մեթոդ կդառնա»:
Օգոստոս 04, 2022 at 15:35