2014թ. Հայաստանի էներգահամակարգի ընկերությունների վարկային պարտավորությունները կազմել են 151,1 միլիարդ դրամ

2014թ. Հայաստանի էներգահամակարգի ընկերությունների վարկային պարտավորությունները կազմել են  151,1 միլիարդ դրամ

ԷկոԼուր

2014թ. Հայաստանի էներգահամակարգի ընկերությունների վարկային պարտավորությունները կազմել են 151,1 միլիարդ դրամ:  Այս մասին սույն թվականի հունվարի 14-ին` տեղի ունեցած 2014 թվականը ամփոփող մամուլ ասուլիսի ժամանակ հայտնել է ՀՀ էներգետիկայի և բնական պաշարների նախարար Երվանդ Զախարյանը:

Հայաստանի էներգահամակարգում իրականացված աշխատանքների ֆինանսավորման համար էներգահամակարգի պետական մասնակցությամբ ընկերությունները ներգրավել են երկարաժամկետ բյուջետային վարկեր՝ շուրջ 140,3 մլրդ դրամ: Միաժամանակ, համակարգի պետական ընկերությունները առևտրային բանկերից ներգրավել են 10,8 մլրդ դրամ առևտրային վարկեր, քանի որ սարքավորումների անվտանգ և հուսալի շահագործման ապահովման համար սակագներում այդ նպատակներով բավարար միջոցներ նախատեսված չեն, ասել է նախարարը: Նա նշել է, որ ֆինանսական միջոցների անարդյունավետ օգտագործման հետևանքով ընկերություններում առաջացել են առևտրային կրեդիտորական պարտավորություններ օգտագործված էներգակիրների, ապրանքների և ծառայությունների գծով՝ 23,8 մլրդ դրամի չափով:

Երվանդ Զախարյանի խոսքով՝ առաջացած խնդիրների գլխավոր պատճառներից են՝ 2012-2014թթ. մարժային տարիներին ոչ իրատեսական էներգահաշվեկշիռները, ՀԱԷԿ-ի լրացուցիչ կանգառը, ջրի սակավությամբ պայմանավորված՝ ՀԷԿ-երում թերի արտադրված էլեկտրաէներգիայի հետևանքով «Հայաստանի էլեկտրական ցանցեր» ՓԲԸ-ում առաջացած ֆինանսական ճեղքվածքը, որը կազմել է շուրջ 27,6 մլրդ. դրամ: Այդ գումարից 3,8 մլրդ. դրամը փոխհատուցվել է, իսկ ընթացիկ մարժային տարում (մինչև 2015թ. օգոստոսը), նախատեսված է փոխհատուցում ևս՝ 9,2 մլրդ. դրամ:

Երվանդ Զախարյանն ասել է, որ հիմնականում գործող սակագները չեն արտացոլում ընկերություններին անհրաժեշտ ծախսերը՝ ուղղված շահագործմանն ու անվտանգություն ապահովող միջոցառումներին: Որոշ ընկերություններում պլանավորվում է ամորտիզացիա և շահույթ, այն դեպքում, երբ մյուս ընկերություններում դրանք չեն նախատեսվում: Արդյունքում մի ընկերությունը աշխատում է վնասով, մյուսը՝ գերշահույթով:

Հունվար 19, 2015 at 16:03


Առնչվող նյութեր


Կատեգորիա

ավելին
պակաս

Մարզեր