2007Թ. Ի ՎԵՐ ԱՐԱՄ ՀԱՐՈՒԹՅՈՒՆՅԱՆԸ ՄԻԱՅՆ ԳԵՂԱՐՔՈՒՆԻՔԻ ՄԱՐԶԻՑ ԳՐՊԱՆԵԼ Է 20-25 ՄԻԼԻԱՐԴ ԴՐԱ՞Մ

2007Թ. Ի ՎԵՐ ԱՐԱՄ ՀԱՐՈՒԹՅՈՒՆՅԱՆԸ ՄԻԱՅՆ ԳԵՂԱՐՔՈՒՆԻՔԻ ՄԱՐԶԻՑ ԳՐՊԱՆԵԼ Է 20-25 ՄԻԼԻԱՐԴ ԴՐԱ՞Մ

Zhamanak.com

Մի շարք մտահոգ բնապահպանների դիտարկմամբ, եթե բնությունը արտահայտվելու հնարավորություն ունենար, վաղուց արդեն կպահանջեր բնապահպանության նախարար Արամ Հարությունյանի հրաժարականը:

Նախարարի թեթև ձեռքով այնպիսի իրավիճակ է ստեղծվել, որ Հայաստանում բնությունը ոչ միայն բերք, այլև հսկայական ապօրինի գումարներ է տալիս: Հենց նույն բնապահպանների միջին հաշվարկներով, տարեկան կտրվածքով Արամ Հարությունյանին հաջողվում է միայն Սևանի բնությունից 20-25 միլիարդ դրամի գումար ամբարել: Այդ գումարի պահանջարկն այնքան մեծ է, որ այն պետբյուջե չի հասնում, քանի որ գրպանվում է բնապահպանության նախարարի կողմից: Իսկ նախագահականն ու կառավարությունը այս ամենի վրա աչք են փակում, որովհետև, մեր տեղեկություններով, այդ գումարի զգալի մասը հանգրվանում է Սերժ Սարգսյանի և վարչապետի գրպանում:

Մեզ հետ զրուցած բնապահպանները, որ առայժմ չեն ցանկանում ներկայանալ, միջազգային դատարան են դիմելու` պահանջելով բնությունից գողացված 20-25 միլիարդ դրամի գումարները, որոնք պետբյուջե մուտքագրվելու փոխարեն, գրպանվել են պետության ղեկավարության կողմից: Ընդ որում` այդ հսկայական գումարը գոյացել է միայն Գեղարքունիքի տարածքում ջրի տակ մնացող անտառների հատումից: Պաշտոնապես հայտարարվել է, որ 913 հեկտար անտառ է հատվել, սակայն իրական թիվը հասնում է 1200 հեկտարի: Նույնիսկ 913 հեկտարի դեպքում գրպանված գումարը 5 միլիարդ դրամ է կազմում: Ամբողջ պաշարը իրացնում է Սևան ազգային պարկը, իսկ ավարը` փոխանցում Արամ Հարությունյանին, ով էլ իր հերթին, մեր աղբյուրների փոխանցմամբ, կիսվում է նախագահի և կառավարության հետ: Նման գումարներ յուրացնելով հանդերձ` նրանք նույնիսկ կենսապաշար օգտագործման պարտադիր վճարները չեն մուծում: Իսկ հարկային տուրք` որպես այդպիսին, նրանց համար գոյություն չունի 2006թ.-ից սկսած:

Ժամանակին, երբ Սևանի գլխավոր դատախազ Կարեն Մարգարյանին պատկանող բենզալցակայանի տարածքից երկու 3-ամյա ծառեր հատվեցին, տնօրենը 150 հազար դրամով տուգանվեց, կտրողը` 100 հազար դրամով և 20 հազար դրամի էլ վնասի հաշվարկ կատարվեց: Այնինչ հիմա 50-60 տարեկան, 40-ից մինչև 90 սմ հաստության ծառներ են կտրվում, ստացված գումարներն էլ մուտքագրվում են նախարարի անձնական բյուջե: Նշենք, որ վառելափայտի 1 խմ-ն արժե 15-20 հազար դրամ, շինանյութը` 10-120 հազար դրամ: Իրենք տեղում 1 խմ վառելափայտը 5000 դրամով են իրացնում, 1 խմ շինանյութն էլ` 40-50 հազար: Եթե հաշվարկենք միայն 1 խմ շինանյութը` 40 հազար դրամով և գումարենք հատված 200 հեկտար անտառից ստացված շինանյութը, ապա 5 միլիարդի պետվճար է ստացվում: Բացի այդ, բնապահպանների հաշվարկներով, Սևանի տարածքում ներկայիս շուկայական գներով 300 միլիոն դրամի հողեր իրացվեցին, որտեղ հազարավոր տնտեսվարողներ իրենց կապիտալը, կոպիտ ասած, ջուրը գցեցին` առանց որևէ փոխհատուցման: Այսօր ևս, կառավարության որոշման համաձայն, 1697 միավոր ապօրինի շենք-շինություն մնալու է ջրի տակ: Սակայն դրանց մի մասը օրինականի անվան տակ կփրկվի` սեփականատերերին արտոնյալ պայմաններ տրամադրելու շնորհիվ: Փրկվածների և կապիտալը պահպանածների շարքում, բնականաբար, Հայաստանի հայտնի օլիգարխներն ու քաղաքական գործիչներն են` Ռուբեն Հայրապետյանը, Գագիկ Ծառուկյանը, Հովիկ Աբրահամյանը, Արթուր Բաղդասարյանը և այլք, որոնցից շատերը իրենց ունեցվածքը գրանցել են զոքանչների անվամբ: Այնուամենայնիվ, 1212 կառույց ճանաչվել է ապօրինի, որոնք էլ, բնականաբար, պատկանում են մանր ու միջին գործարարներին: Նրանք, բացի կապիտալը կորցնելուց, նաև հսկայական պարտքերի տակ են ընկնում: Ապօրինի շինության 1 քմ-ի համար հաշվարկվում է 5 հազար դրամի վնաս, և նրանք միջին հաշվարկներով դեռ 1 միլիոն դրամի տուգանք պիտի վճարեն: Բայց այստեղ կա ևս մեկ բայց: Ժամանակին այդ ապօրինի շինությունները օրինականացնելու համար նույն Արամ Հարությունյանը հսկայական թվերի հետ է խաղացել: Տնտեսվարողները միայն բնապահպանական պայմանագրերի համար 10-15 հազար դոլար գումար են տվել, որ իրենց գործունեությունը կեղծված փաստաթղթերով ժամանակավոր օրինականացնեն: Իսկ ապօրինի ճանաչված 1200 տնտեսվարողները չափից ավելի խոսուն վկայում են, թե որքան գումարներ են մուտքագրվել Արամ Հարությունյանի գրպան, որպեսզի պայմանագրեր կնքելու թույլտվություն տա` իբր տնտեսվարողները բնապահպանական փորձաքննություն են անցել: Եվ այսքանից հետո թե՛ Տիգրան Սարգսյանը, թե՛ Սերժ Սարգսյանը Արամ Հարությունյանին հրաժարականի դիմում գրել չեն տալիս, քանի որ նա քարից փող սարքող տղա է, իսկ ստացված շահույթը ախպերափայ կիսվում է իրենց հետ:

Դեկտեմբեր 22, 2010


Առնչվող նյութեր


Կատեգորիա

ավելին
պակաս

Մարզեր