ԷկոԼուր
ՀՀ կառավարությունը հերթական անակնկալը մատուցեց «GeoProMining Gold» ընկերության անօրինական գործունեության վերաբերյալ ահազանգ բարձրացրած հասարակությանը: Ավելի քան 8 ամիս տարբեր հասարակական կազմակերպություններ, քաղաքական կուսակցություններ, քաղաքացիական նախաձեռնություններ, տեղի բնակիչներ պահանջում են պատժել «GeoProMining Gold» ընկերությանը, որ վերջինս առանց թույլատրող փաստաթղթերի Սեւանա լճի ջրահավաք ավազանում կառուցել է վերամշակման արտադրամաս, որով խախտել է մի շարք բնապահպանական օրենքներ` մասնավորապես «Սեւանա լճի մասին» ՀՀ օրենքը:
Կառավարությունը հետեւյալ կերպ է արձագանքել այդահազանգերին` ՀՀ բնապահպանության նախարարությանը հանձնարարելով պարզել խնդիրը: Եւ նախարարության ներկայացուցիչները հանդիպեցին հասարակայնության հետ: Իսկ հետո հայտարարվեց ՀՀ Էներգետիկայի եւ բնական պաշարների նախարարության ներգրավմամբ աշխատանքային խմբի ստեղծման մասին: Այսինքն, տեսչական ստուգումների փոխարեն գործի մեջ է ընդգրկվում նախարարություն, որը տեսչական գործառույթներ չունի ոչ իր գործունեության, ոչ առաքելության եւ կանոնադրության տեսակով: Չունի համապատասխան գիտելիքներ եւ համապատասխան մասնագետներ: Բնապահպանական օրենսդրության պահպանման իրավասու մարմին չէ: Բայց տվյալ պարագայում հենց այդ օրենսդրությունն է խախտվել: Ավելին, դա հակասում է գործառույթների բաժանման հասկացությանը, երբ մի գերատեսչություն զբաղվում է ընդերքի շահագործման հարցերով, իսկ մյուսը վերահսկում է այդ գործընթացը:
Հասկանալի է դառնում, որ ՀՀ բնապահպանության նախարարությանը հեռացնում են «GeoProMinning Gold» ընկերության գործի հետաքննումից: Եթե ստուգումն իրականացներ միայն բնապահպանական տեսչությունը, ապա նա չէր կարող խուսափել ակտ կազմելուց: Իսկ այսպես ստուգումների արդյունքների համար պատասխանատվությունը կիսվում է երկու նախարարությունների միջեւ: Ի դեպ, Էներգետիկայի եւ բնական պաշարների նախարարությունը Գավառի Օրհուս կենտրոնին ուղղված 2011թ. մայիսի 10-ի իր թիվ 07/16/1764-11 նամակում արդեն իսկ գնահատական է տվել ընկերության գործունեությանը: Նամակում նշված է, որ ընկերությունը շահագործում է Սոտքի հանքավայրը օրենսդրության համաձայն, իսկ շրջակա միջավայրի վրա ազդեցության գնահատումը Բնապահպանության նախարարության առանձնաշնորհն է:
Նոյեմբեր 29, 2011 at 14:46