«ՈՐ ՈՒԶԵՆԱ ԾԱՌՈՒԿՅԱՆ ԳԱԳՈՆ ՉԻ՞ ԿԱՐԱ ԷԴ ԱՄԵՆԸ ՍԱՐՔԻ». ԶԻՐՈՅԱՆԻ ԱՌԱՋԱՐԿՆԵՐԸ ԳՈՐԾԱՐԱՐՆԵՐ Հ. ՎԱՐԴԱՆՅԱՆԻՆ ՈՒ Գ. ԾԱՌՈՒԿՅԱՆԻՆ

Panorama.am

Բնապահպանության նախարարության կենսառեսուրսների կառավարման գործակալության պետ, գիտնական Արտաշես Զիրոյանը Գեղարքունիքի մարզի զարգացման, այստեղ աշխատատեղերի ստեղծման մասին ծրագիր է մշակել, բայց այն մնացել է թղթի վրա: Panorama.am-ի թղթակցի հետ զրույցում Զիրոյանն ասաց, որ Գեղարքունիքի մարզի Վարդենիս, Մարտունի և Գավառ բնակավայրերում դեռևս հին ժամանակներում նրա խոսքով` «մեր պապերը» ծխախոտագործությամբ էին զբաղվում և բարձրորակ բերք ստանում:

«Բայց այսօր ծխախոտագործությունը տեղափոխվել է Արարատյան դաշտավայր կամ Տավուշի մարզ: Խայտառակություն է, չէ՞ որ այնտեղի հողերը բերրի են և դրանք պետք է օգտագործել պտղատու ծառերի` խաղողի, ծիրանի ու բանջարաբոստանային կուլտուրաների աճեցմամբ: Իսկ էսօր «Գրանդ Քենդին» տարել, ընդեղ ա դեմ արել», -վրդովված նշեց բնապահպանության նախարարության պաշտոնյան:

Նշենք, որ «Գրանդ Քենդի» ասելով Զիրոյանը նկատի ունի գործարար Հրանտ Վարդանյանին, ով ծախախոտի արտադրությամբ է զբաղվում, իսկ Տավուշի մարզում և Արարատյան դաշտավայրում նրա պատվերով մարդիկ ծխախոտագործությամբ են զբաղվում:

Գիտնականի խոսքով, Գեղարքունիքի մարզի նշված բնակավայրերում ծխախոտի որակը ավելի բարձր է, քան Արարատյան դաշտավայրինը:

Հետաքրքրվեցինք, առաջարկը ներկայացրե՞լ է Հրանտ Վարդանյանին, Զիրոյանը պատասխանեց. «Ո՞ւմ ասեմ է, ասեմ գան, գնդակահարե՞ն, նրան ձեռք ա տալիս էդ հատվածներում անի, որովհետև տերևների մակերեսը մեծ է, բայց չի հասկանում, որ Մարտունիում կենսաակտիվ նյութերը ավելի բարձրորակ են, այնտեղի ծխախոտը ավելի որակով է»:

Զիրոյանի` մշակած և դեռևս կյանքի չկոչված մյուս ծրագիրը Գեղարքունիքի մարզում կարտոֆիլի կուտակումները վերացնելուն է ուղղված: Նրա տվյալով, այսօր բավականին մեծ քանակությամբ կարտոֆիլ է կուտակված Վարդենիսում, Մարտունիում, որը չի հաջողվում գյուղացուն իրացնել:

«Այսօր կարտոֆիլի այնպիսի սորտեր կան, որոնք 70-80 տոկոս օսլա են պարունակում, դրանք կարելի է դնել արտադրության մեջ ու թուղթ արտադրել, թղթի արտադրություն ստեղծենք, որի համար գործարան է պետք: Էդ ի՞նչա, որ ուզենա Ծառուկյան Գագոն չի՞ կարա էդ ամեն ինչը սարքի: Թուղթ սարքենք, թուղթը վաճառենք, թե չէ հիմա կարտոֆիլը չենք կարողանում իրացնել», -տարբերակն առաջարկեց Արտաշես Զիրոյանը:

Հունիս 04, 2010


Առնչվող նյութեր


Կատեգորիա

ավելին
պակաս

Մարզեր