Երկարաձգվեց Սևանա լճից արդյունագործական ձկնորսության ժամկետը, ավելացվեց որսի չափաքանակը

Երկարաձգվեց Սևանա լճից արդյունագործական ձկնորսության ժամկետը, ավելացվեց որսի չափաքանակը

Գործադիրն ավելացրեց Սևանա լճից սիգի արդյունագործական որսի չափաքանակը 50 տոննայով, ինչպես նաև երկարձգեց ձկան որսի ժամկետը մինչև սույն թվականի հոկտեմբերի 15-ը: Որոշումն ընդունվեց ՀՀ կառավարության սեպտեմբերի 2-ի նիստում:  

Նշենք, որ 2021 թվականի մայիսի 14-ից մեկնարկած Սևանա լճում սիգի արդյունագործական որսի վերջնաժամկետ էր նշանակված սեպտեմբերի 1-ը: Այդ ընթացքում պետք է որսվեր 250 տ սիգ: Շրջակա միջավայրի նախարարության հետ կնքվել է 303 պայմանագիր շուրջ 221 տ 164 կգ ձկան որս իրականացնելու համար: Ըստ որոշման հիմնավորման, սահմանված չափաքանակից շուրջ 29 տոննա սիգի համար հայտ չի ներկայացվել: Ներկայացված հայտերի շրջանակներում 2021 թվականի օգոստոսի 31-ի դրությամբ ևս առկա է շուրջ 20 տոննա, ինչը պայմանագիր կնքած ձկնորսները, եղանակային պայմաններով պայմանավորված, չեն հասցրել որսալ մինչև սեպտեմբերի 1-ը:

Որսի նոր ժամկետ սահմանելու և ծավալն ավելացնելու որոշման հիմքում, ըստ հիմնավորման, ընկած են Գեղարքունիքի մարզում առկա սոցիալական խնդրի կարգավորման հարցն ու ձկնորսների կողմից հնչեցված դժգոհությունները: Հիմնավորման մեջ նաև նշված է, որ առաջարկը քննարկվել է նաև ՀՀ Գիտությունների ազգային ակադեմիայի կենդանաբանության և հիդրոէկոլոգիայի գիտական կենտրոնի գիտնականների հետ և ձեռք է բերվել համաձայնություն: Մասնավորապես՝ կենտրոնից հայտնել են, որ չեն առարկում այս առաջարկին Շրջակա միջավայրի նախարարության՝ ձկնորսության գործընթացի նկատմամբ խիստ հսկողություն սահմանելու դեպքում:

Սակայն ինչպես է իրականացնելու Շրջակա միջավայրի նախարարությունն այդ խիստ վերահսկողությունը, հայտնի չէ՝ հաշվի առնելով ապօրինի որս իրականացնելու մեծաքանակ դեպքերի արձանագրումը: Նախարարությունը պարտավոր էր մինչ նախագծի ընդունումը երաշխիքներ ներկայացնել այդ վերահսկողությունն իրականացնելու համար անհրաժեշտ մեխանիզմներ, հմտություն ու ռեսուրսներ ունենալու մասին: Մյուս կողմից խնդիր է ձկան որսի ծավալի իրական թվի անհայտ լինելը՝ հաշվի առնելով ապօրինի որսի ծավալները:

Հիշեցնենք, որ  ԷկոԼուրին ՀՀ ԳԱԱ կենդանաբանության և հիդրոէկոլոգիայի կենտրոնի տրամադրած տվյալների համաձայն, եթե 2013-2018թթ. ընթացքում ձկան ընդհանուր կենսազանգվածը տարեցտարի աճել է, 1296 տոննայից հասնելով 2948 տոննայի, ապա 2018թ. հետո նվազել՝ 2019թ. կազմելով 2668 տոննա, 2020թ.՝ 2345 տոննա: Նույն կերպ նվազել է նաև սիգի արդյունագործական պաշարը՝ կազմելով համապատասխանաբար՝ 2019թ-ին 667 տոննա, 2020թ-ին՝ 586 տոննա: ՀՀ ԳԱԱ կենդանաբանության և հիդրոէկոլոգիայի կենտրոնը ձկան և խեցգետնի պաշարների ամենամյա գնահատումն իրականացրել է Շրջակա միջավայրի նախարարության հետ կնքած պայմանագրի շրջանակներում: 

Սևանա լճի ձկնապաշարների նվազումն իր հերթին վատթարացնում է լճի էկոլոգիական վիճակը՝ հաշվի առնելով, որ ձուկը լճում օրգանական նյութի յուրացնողն է: Կեղտաջրերի ներհոսքի, մակարդակի նվազման, բավարար ձկնապաշար չլինելու պայմաններում լճում մեծանում է օրգանական նյութի կոնցենտրացիան: Այս իրավիճակում բարձր ջերմաստիճանը նպաստում է Սևանա լճի ճահճացման գործընթացների ակտիվացմանը:

Հիշեցնենք, որ այս տարի գործադիրը որոշեց Սևանա լճից մինչև 245 միլիոն խմ ջրառ իրականացնել: Լճից արդեն բաց է թողնվել 195.129 միլիոն խմ ջուր: Սեպտեմբերի 2-ի դրությամբ լճի մակարդակը կազմում է 1900.61մ, ինչը 7 սմ-ով ցածր է նախորդ տարվա նույն օրվա ցուցանիշից:

Սեպտեմբեր 02, 2021 at 17:18


Առնչվող նյութեր


Կատեգորիա

ավելին
պակաս

Մարզեր