Հայաստանի 7 համայնքները կբարձրաձայնեն էկոլոգիական մարտահրավերներն ու առաջարկները ՄԱԿ-ի COP17 համաժողովում
Հոկտեմբերի 21-ին՝ ժ. 14:00, ՄԱԿ-ի Կենսաբազմազանության մասին կոնվենցիայի կողմերի 17-րդ համաժողովի (CBD COP 17) Կանաչ գոտում տեղի կունենա «Համայնքները՝ կենսաբազմազանության պահպանողներ և կայուն օգտագործողներ» խորագրով պաշտոնական կողմնակի միջոցառումը։
Միջոցառումը կազմակերպվում է «Էկոլուր» տեղեկատվական ՀԿ-ի կողմից՝ «Ֆրիտյոֆ Նանսեն» ինստիտուտի հետ համագործակցությամբ և Նորվեգիայի զարգացման համագործակցության գործակալության (Norad) աջակցությամբ:
Միջոցառման առանցքը
Համաշխարհային բնապահպանական որոշումների կայացման հարթակում հաճախ անտեսվում է տեղական համայնքների ձայնը։ Այս սեսիայի ընթացքում ՀՀ Գեղարքունիքի մարզի Սևան, Տավուշի մարզի Դիլիջան, Վայոց ձորի մարզի Ջերմուկ և Եղեգնաձոր, Արարատի մարզի Արմաշ, Լոռու մարզի Դեբետ և Դսեղ բնակավայրերի ներկայացուցիչները միջազգային հանրությանը կներկայացնեն էկոհամակարգերի պահպանման իրենց անմիջական փորձն ու առաջարկները:
Կքննարկվեն հրատապ թեմաներ՝
- կլիմայի փոփոխության հարվածը և ջրային ռեսուրսների ճգնաժամը,
- անտառների պահպանությունն ու բնակչի սոցիալ-տնտեսական բարեկեցությունը,
- հանքարդյունաբերության ազդեցությունը կենսաբազմազանության, զբոսաշրջային ու գյուղատնտեսական գոտիների վրա,
- էկոտուրիզմի զարգացումն ու տեղական կանաչ ձեռնարկատիրությունը։
Գլխավոր իրադարձություն
Միջոցառման ավարտին համայնքների կողմից կընդունվի և կհրապարակվի «Հանուն կենսաբազմազանության պահպանության, վերականգնման և կայուն օգտագործման» համայնքային հայտարարությունը՝ ուղղված ՄԱԿ-ի Կենսաբազմազանության կոնվենցիայի քարտուղարությանը, Կողմ երկրներին և միջազգային կառույցներին:
Օրակարգային մանրամասներ
Բացման խոսք՝ Ինգա Զարաֆյան («Էկոլուր» տեղեկատվական ՀԿ նախագահ), Փոլ Ուիլթեր Սքեդսմո («Ֆրիտյոֆ Նանսեն» ինստիտուտի ավագ գիտաշխատող, «Աջակցություն Հայաստանի՝ Կենսաբանական բազմազանության մասին կոնվենցիայի կողմերի համաժողովի նախագահությանը և ներքին իրականացմանը» ծրագրի համակարգող), Մկրտիչ Դալլաքյան ( Հայնրիխ Բյոլ հիմնադրամի Երևանի գրասենյակի կլիմայի փոփոխության և շրջակա միջավայրի ծրագրի համակարգող)։
Մոդերատոր՝ Վիկտորյա Բուռնազյան («Էկոլուր» տեղեկատվական ՀԿ փոխնախագահ)։
Հրավիրում ենք զանգվածային լրատվության միջոցների ներկայացուցիչներին՝ ակտիվորեն լուսաբանելու այս կարևոր հանդիպումը, վերցնելու հարցազրույցներ ազդակիր համայնքների ներկայացուցիչներից և աջակցելու տեղական ձայների միջազգայնացմանը։
Հոկտեմբեր 20, 2026 at 16:26