Ախուրյանի վտակ Գյումրի գետակի գետնուղու վթարային վիճակի մասին Էկոլուրի՝ ՀՀ ներքին գործերի նախարարություն ուղարկած նամակին պատասխանել է ՀՀ ներքին գործերի նախարարության «Սեյսմիկ պաշտպանության տարածքային ծառայություն» ՊՈԱԿ-ի տնօրեն Ս․ Մարգարյանը։
Հիշեցնենք, որ իր նամակում «Էկոլուր» տեղեկատվական ՀԿ-ն նշել էր, որ ահազանգ է ստացել Գյումրիի բնակիչներից, որ փլուզման վտանգի տակ է Ախուրյանի վտակ Գյումրի գետակի գետնուղին, ինչը կարող է աղետալի հետևանքներ ունենալ Գյումրի քաղաքի համար։
Ըստ բնակիչների՝ ժամանակին, երբ գետը վարարում էր, քաղաքի կենտրոնը տիղմով էր լցվում, անգամ կառքերը չէին կարողանում անցնել։ Այդ պատճառով էլ հանրային միջոցներով 1907թ. կառուցվել է 6 մ լայնությամբ, 4 մ բարձրությամբ և 900 մ երկարությամբ Գյումրի գետակի գետնուղին, որպեսզի գետը չհեղեղվի։ Այն դարձել է Գյումրիի կողուղատարը և աղբատարը․ բնակիչներն աղբ են լցնում գետի մեջ, Գյումրիի ձախափնյա ամբողջ թաղամասում կոլեկտոր չկա, բոլոր կոյուղագծերով կեղտաջրերը լցվում են գետակ։ Գետնուղին անցնում է Գյումրիի հին պատմական կենտրոնով, կենտրոնական հրապարակով, եկեղեցիների կողքով։ Այժմ գետնուղին լցված է աղբով։ Որոշ հատվածներում գետնուղու կողային պատերը քայքայվել են, բայց վերևի ծածկը մնացել է օդում կախված։ «Եթե փլուզում եղավ, քաղաքի կենտրոնական, պատմական հատվածի զգալի մասը ջրածածկ կլինի։ Անհրաժեշտ է գետնուղին կապիտալ վերակառուցել, մաքրել աղբից»,- ասել են բնակիչները։ Նրանք նշել են, որ Գյումրիի համայնքապետարանն իր ուժերով ի զորու չէ միայնակ խնդիրը լուծել։
Էկոլուրը խնդրել էր տեղեկացնել խնդրի կարգավորմանն ուղղված նախարարության միջոցառումների մասին։
Ի պատասխան ՀՀ ներքին գործերի նախարարության «Սեյսմիկ պաշտպանության տարածքային ծառայություն» ՊՈԱԿ-ի տնօրեն Ս․ Մարգարյանը սույն թվականի հունիսի 13-ի N96/1141 նամակով հայտնել է․«Տեղեկացնում եմ, որ ՀՀ ներքին գործերի նախարարության փրկարար ծառայության և Գյումրու համայնքապետարանի համապատասխան մասնագետների կողմից իրականացվել են քաղաքի կենտրոնական հատվածով անցնող Գյումրի գետակի երկայնքով՝ Ռուսթավելի փողոցի 1-ին նրբանցքից մինչև Աբովյան փողոցի վերջնամասի ակնադիտական ուսումնսաիրություններ։ Ուսումնասիրությունների արդյունքում պարզվել է, որ վերոնշյալ գետակը, որն օգտագործվում է նաև որպես կոյուղի, լցված է կենցաղային աղբով, իսկ Սուրբ Նշան եկեղեցու հարևանությամբ գետակն անցնում է փակ հատվածով և առկա են ծածկի կիսաքանդ հատվածներ։ Քաղաքի Աբովյան փողոցի վերջնամասով անցնող գետակը, որպես սելավատար, անցնում է բաց հատվածով, որը նույնպես լցված է կենցաղային աղբով։
Հաշվի առնելով հարցի կարևորությունը՝ ՀՀ ներքին գործերի նախարարության փրկարար ծառայությունը դիմել է Ջրային կոմիտե՝ հարցին առաջնահերթ լուծում տալու նպատակով»։
Էկոլուրը նամակով դիմել ՀՀ տարածքային կառավարման և ենթակառուցվածքների նախարարության ջրային կոմիտե՝ խնդրելով տեղեկացնել խնդրի լուծման վերաբերյալ Ջրային կոմիտեի նախաձեռնած միջոցառումների մասին։
Հունիս 27, 2024 at 16:54