ԷկոԼուր
Մենք չենք կարող ընդունել այն բացատրությունները, որ ծառերի խորը էտը չի ազդում ծառերի աճին ու զարգացմանը, եւ միաժամանակ վնասատուների դեմ պայքարի միջոց է: Երևանի քաղաքապետարանի աշխատակազմի բնապահպանության վարչության պետ Ավետ Մարտիրոսյանի հետ հասարակայնության ներկայացուցիչների մարտի 21-ի հանդիպման ընթացքում Ավետ Մարտիրոսյանը վստահեցրեց, որ խորը էտի հարցը քննարկվել է ՀՀ ԳԱԱ Բուսաբանության ինստիտուտի տնօրեն Ժիրայր Վարդանյանի հետ, եւ արդյունքում քաղաքապետարանը որոշում է ընդունել մի քանի ճյուղ թողնել էտված ծառի բնի վրա, որպեսզի չխախտվի ծառի կենսական գործառույթները: «Մենք շատ բողոքներ ենք ստանում, որ միջատները մտնում են բնակելի տներ, խանգարում են բնակիչներին»,- ասաց Ավետ Մարտիրոսյանը:
ԷկոԼուրի դիրքորոշումը հետեւյալն է (այն ներկայացրեց «ԷկոԼուր» տեղեկատվական ՀԿ-ի նախագահ Ինգա Զարաֆյանը). «Երեւանի կանաչապատումն ունի հիմնական նպատակ՝մեղմել խիստ միկրոկլիման եւ թթվածին տալ քաղաքին: Տերեւներ չունեցող ծառերը չեն կարող այդ գործառույթը կատարել: Ճյուղազերծ ծառերի բները կարող են ապրել առանց տերեւ, բայց այդպես էլ կմնան մինչեւ հաջորդ սեզոն, մինչեւ աճեն ճյուղեն ու տերեւները, որոնք նորից էտի կենթարկվեն: Պետք է վնասատուների դեմ պայքարի այլ միջոց գնտել, այլ ոչ թե ոչնչացնել կանաչ զանգվածը»:
Ավետ Մարտիրոսյանը նշեց, որ քաղաքի կանաչապատման խնդիրը հրատապ խնդիր է: Նա հայտնեց ապրիլի 9-ին նախատեսվող շաբաթօրյակի մասին եւ հրավիրեց հասարակայնությանը մասնակցել ծառատունկի: Ծառատունկի համար ընտրված տարածքների վերաբերյալ հարցին Մարտիրոսյանը պատասխանեց, որ ընտրվել են այն տարածքները, որոնք ունեն ոռոգման համակարգ՝ Ծիծեռնակաբերդ, Հաղթանակի զբոսայգի, Երեւանի բուսաբանական այգի:
Մարտ 23, 2016 at 18:30