ԷկոԼուր
Օգոստոսի 20-ին տեղի ունեցած «Զանգեզուրի պղնձամոլիբդենային կոմբինատ» ՓԲԸ-ի պոչատար խողովակաշարի վթարի արդյունքում ջրային ռեսուրսներին պատճառվել է 294.0 հազար դրամի վնաս:
«Ողջի գետից կատարված նմուշառման անալիտիկ հետազոտությունների և խողովակատարից արտահոսքի ծավալների հաշվարկի համադրության արդյունքում արձանագրվել է շուրջ 38 տոննա ապարախյուս, որից 28 տոննան լցվել է բաց ջրավազան»: Այս մասին տեղեկացնում է ՀՀ բնապահպանության նախարարության պաշտոնական կայքը:
Հիշեցնենք, որ կոմբինատի պոչատար խողովակաշարում տեղի ունեցած վթարի հետեւանքով Սյունիքի մարզկենտրոն Կապան քաղաքով հոսող Ողջի գետը մի ամբողջ օր մոխրագույն էր եւ գարշահոտ էր տարածում:
Պաշտոնական տեղեկատվության համաձայն` ԶՊՄԿ-ն 294.0 հազար դրամն արդեն փոխանցել է պետական բյուջե, ինչպես նաեւ ընկերությանը տրվել են հանձնարարականներ բնապահպանական օրենսդրության պահանջների կատարման և հնարավոր խախտումների վերացման վերաբերյալ, մասնավորապես հետագա հնարավոր վթարների դեպքում ապարախյուսի արտահոսքը շրջակա միջավայր հնարավորինս բացառելու նպատակով միջոցառումներ ձեռնարկելու մասին:
Սեպտեմբեր 14, 2012 at 15:49