ԷկոԼուր
Հայ եւ իրանացի պաշտոնյաները Երեւանում քննարկել են առևտրատնտեսական, էներգետիկայի, տրանսպորտի և կապի, հանքարդյունաբերության, բնապահպանության, առողջապահության, գյուղատնտեսության, աշխատանքի և սոցիալական հարցերի, կրթական, մշակութային բնագավառներին, ինչպես նաև միջմարզային համագործակցությանն առնչվող հարցեր: Այս մասին տեղեկացնում է ՀՀ էներգետիկայի եւ բնական պաշարների նախարարության պաշտոնական կայքը: Քննարկումներն անցկացվել են հայ-իրանական միջկառավարական հանձնաժողովի 11-րդ նիստի ընթացքում: Նիստը բացել են հայկական կողմի համանախագահ, ՀՀ էներգետիկայի և բնական պաշարների նախարար Արմեն Մովսիսյանը և իրանական կողմի համանախագահ, Իրանի Իսլամական Հանրապետության էներգետիկայի նախարար Մաջիդ Նամջուն: «Ներկայումս օրակարգում են Իրան-Հայաստան բարձրավոլտ էլեկտրահաղորդման 3-րդ գծի, Արաքս գետի վրա համատեղ ՀԷԿ-երի և նավթամթերքների խողովակաշարի շինարարության նախագծերն ու համագործակցության ընդլայնումը նավթաքիմիայի բնագավառներում»,- իր ելույթում մասնավորապես ասել է նախարար Արմեն Մովսիսյանը: Հոկտեմբերի 25-ին կողմերը ստորագրել են «Հայ-իրանական միջկառավարական հանձնաժողովի 11-րդ համատեղ նիստի փոխըմբռնման հուշագիր»:
Լուսանկարը` www.minenergy.am կայքի
Հոկտեմբեր 25, 2012 at 17:28