ԷկոԼուր
Սեւանա լճում ձկնաբուծարանի գործունեությունից լճի համար նորմատիվային շեղումներ չեն եղել: Այս մասին տեղեկացնում է Բնապահպանության նախարարության պաշտոնական կայքը: Աղբյուրի համաձայն`ՀՀ բնապահպանության նախարարությունում նախարարի առաջին տեղակալ Սիմոն Պապյանը խորհրդակցություն է անցկացրել Սևանա լճի էնդեմիկ ձկնատեսակների պոպուլյացիաների ցանցավանդակային եղանակով վերականգնման պիլոտային ծրագրի իրականացման վերաբերյալ: Խորհրդակցությանը մասնակցել են ՀՀ Նախագահին առնթեր «Սևանա լճի հիմնահարցերի հանձնաժողովի նախագահի տեղակալ Յուրի Ջավադյանը ՀՀ ձկնաբուծության և հիդրոէկոլոգիայի ինստիտուտի տնօրեն Բարդուխ Գաբրիելյանը, ՀՀ ԳԱԱ Հիդրոէկոլոգիայի և ձկնաբանության ինստիտուտի տնօրեն Էվիլինա Ղուկասյանը, Հայկական բերքի առաջմղման կենտրոնի գլխավոր փորձագետ Էդվարդ Գևորգյանը, ՀՀ Բնապահպանության նախարարության կենսառեսուրսների գործակալության պետի տեղակալ Աշոտ Վարդևանյանը, «Սևան ազգային պարկ»-ի տնօրենի տեղակալ Վահե Գուլանյանը:
Պիլոտային ծրագիրն իրականացնում է «Էմի ֆրութ» ընկերությունը: «Ծրագրի շրջանականերում համապատասխան մասնագիտացված կազմակերպությունների կողմից կատարվում են մշտադիտարկումներ, և այդ ժամանակահատվածում ընդհանուր առմամբ նորմատիվից շեղումներ մինչ օրս չեն արձանագրվել:
Խորհրդակցության ընթացքում Հայկական բերքի առաջմղման կենտրոնի(ՀԲԱԿ) գլխավոր փորձագետ Էդվարդ Գևորգյանը նշել է, որ մշտադիտարկումների արդյունքում ցանցավանդակներում աճեցված ձկները մոտ 30-40%-ով ավելի քիչ արհեստական կերով են սնվում քան նախատեսված էր պիլոտային ծրագրի նախագծով»,- գրում է կայքը::
Սևանա լճի էնդեմիկ ձկնատեսակների պոպուլյացիաների վերականգնման պիլոտային ծրագրի նախնական արդյունքները նախատեսվում է ամփոփել 2013թ. մայիսին: Խորհրդակցության ժամանակ պայմանավորվածություն է ձեռք բերվել մշտադիտարկումներ իրականացնել նաև պիլոտային ծրագրի ավարտից հետո: Առաջարկվել է նաև պիլոտային ծրագիրն իրականացնող կազմակերպությանը ՀՀ բնապահպանության նախարարություն ներկայացնել ցանցավանդակներում աճեցրած էնդեմիկ ձկնատեսակների 2013թ. Սևանա լիճ բաց թողնման քանակությունների վերաբերյալ առաջարկություն:
Հունվար 17, 2013 at 14:58