Ըստ պաշտոնական տեղեկատվության՝ ապօրինի ծառահատումները գրեթե կիսով չափ կրճատվել են

ԷկոԼուր

2011 թվականի համեմատ 2012 թվականի ընթացքում ապրինի ծառահատումները գրեթե կիսով չափ կրճատվել են: “2012թ. ընթացքում ընդհանուր առմամբ ապօրինի հատումների քանակը կազմել է 1860` 2011թ. 3081-ի դիմաց: … ապօրինի հատման դեպքերի նվազմանը նպաստել են անտառտնտեսություններում հսկողության խստացումը, իրավապահ մարմինների կողմից ձեռնարկված միջոցառումները, ինչպես նաեւ բնակչությանն անվճար թափուկի տրամադրումը”,- այս տվյալները փետրվարի 1-ին ՀՀ-ում ապօրինի հատումների դեմ պայքարի աշխատանքները համակարգող անտառների պետական մոնիտորինգի խորհրդի նիստի ընթացքում իրենց 2012թ. հաշվտվություններում ներկայացրել են "Անտառային պետական մոնիտորինգի կենտրոն" եւ "Հայանտառ" ՊՈԱԿ-ները: Նիստը վարել է ՀՀ փոխվարչապետ, խորհրդի նախագահ Արմեն Գեւորգյանը:

ՀՀ ոստիկանության տվյալների համաձայն` 2012թ. ապօրինի հատումների վերաբերյալ հարուցվել է 22 քրեական գործ` 2011թ. 16-ի փոխարեն: Ընդհանուր առմամբ 2012թ-ի ընթացքում պետությանը պատճառվել է շուրջ 31 մլն դրամի վնաս, որից հատուցվել է մոտ 17 մլն դրամը: Ներկայացվեցին նաեւ արձանագրված վարչական իրավախախտումների վերաբերյալ տվյալները` ըստ մարզերի: Փոխվարչապետը դրական համարեց 2012թ. Լոռու մարզում իրավախախտումների դեպքերի նվազումը` միաժամանակ մտահոգություն հայտնելով Տավուշի մարզի ցուցանիշների վերաբերյալ: Նա պատասխանատուներին հանձնարարեց անհրաժեշտ քայլեր ձեռնարկել այդ ուղղությամբ: Այս մասին տեղեկացնում է ՀՀ տարածքային կառավարման նախարարության պաշտոնական կայքը:

Փետրվար 04, 2013 at 17:52