Հայ Ազգային Կոնգրեսից Երևանի ավագանու թեկնածուները երեւանցիներին հրավիրում են քննարկման

ԷկոԼուր

Երեւանի ավագանու ընտրություններին մասնակցող Հայ Ազգային Կոնգրեսի ավագանու թեկնածուներ Գայանե Ղազարյանը, Արմեն Օհանյանը, Արամազդ Ղալամքարյանը և Եվա Թովմասյանը բոլոր երևանցիներին հրավիրում են «Կոնգրեսի ավագանու թեկնածուների հետ քաղաքապետարանի գործունեության նկատմամբ հանրային վերահսկողության և որոշումների կայացմանը հանրության մասնակցության մեխանիզմների ստեղծման վերաբերյալ. էկոլոգիական հիմնախնդիրներ, պատմամշակութային ժառանքության պահպանություն, ճարտարապետական խեղուներ» թեմայով  քննարկմանը:

Այն տեղի կունենա ապրիլի 27-ին` ժամը 12:00-ին, «ԷկոԼուր» մամուլի ակումբում (Հանրապետության 49, «Եվրոպա» հյուրանոցի դիմացի շենք, մուտքը բակի կողմից, առաջին հարկ, նախավերջին դուռ):

Քննարկման մասին տեղեկատվության մեջ գրված է.

«Հայ Ազգային Կոնգրեսի՝ ավագանու ցուցակում ընդգրկված՝

Գայանե Ղազարյանը

Արմեն Օհանյանը

Արամազդ Ղալամքարյանը

Եվա Թովմասյանը

բոլոր երևանցիներին հրավիրում են քննարկելու և մշակելու այն մեխանիզմները, որոնք հանրությանը հնարավորություն կտան վերահսկել քաղաքապետարանի կողմից ընդունվող բոլոր որոշումները դեռևս դրանց նախնական փուլում:

Երևանի ավագանու անդամի իրավունքները թույլ են տալիս ծանոթանալու քաղաքային իշխանության կողմից ընդունվող որոշումներին, հայեցակարգերին, քաղաքային բյուջեից ծախսվող գումարներին և առհասարակ Երևանին վերաբերող բոլոր գործընթացներին:

Ավագանու անդամներն իրավունք ունեն նաև իրազեկել հանրությանը նշված գործողությունների մասին, ինչը հնարավորություն կընձեռի բոլոր տեսակի բացասական գործընթացները կանխարգելել վաղ փուլում, այլ ոչ թե պայքարել դրանց հետևանքների դեմ, ինչպես տեղի է ունենում այսօր:

Բացի այդ, գործող օրենսդրության համաձայն՝ հանրությունը հանրային շահերի պաշտպանության հայցով դատարան դիմելու իրավունք չունի, սակայն հանրության խմբերի առաջարկությամբ նման հայցով դատարան կարող են դիմել ավագանու անդամները: Օրենքի համաձայն՝ ավագանու անդամների մեկ հինգերորդը, ինչպես նաև յուրաքանչյուր խմբակցություն կարող են դիմել վարչական դատարան` ավագանու և քաղաքապետի ակտերի իրավաչափությունը վիճարկելու հարցով:

Ուստի մեր կողմից առաջարկում ենք քաղաքապետարանի որոշումների վերահսկման հետևյալ մեխանիզմները, որոնց հիմքով կարող է ընթանալ գալիք քննարկումը.

1. Քաղաքացիական ակտիվիստների խմբի ձևավորում, որին ավագանու անդամի կողմից կփոխանցվի հանրության սեփականություն հանդիսացող ցանկացած տեղեկատվություն՝ խուսափելու համար պաշտոնական հարցում կատարելու և կցկտուր տեղեկատվություն ստանալու այսօրվա անարդյունավետ և ոչ թափանցիկ պրակտիկայից:
2. Քաղաքացիական նախաձեռնությունների և ՀԿ-ների հետ մշտական կապի հաստատում և տեղեկատվության փոխանակում:

Քննարկումից զատ առանձին կներկայացնենք նաև Երևանի հանրային կանաչ տարածքների վերաբերյալ քաղաքականության, պատմամշակութային հուշարձանների պաշտպանության, ճարտարապետական տեսքի վերականգնման վերաբերյալ մեր կոնկրետ ծրագրային անելիքները»:

Ապրիլ 26, 2013 at 16:11