Գերմանացի լրագրողներին ներկայացվեցին Հայաստանի բնապահպանական խնդիրները

ԷկոԼուր

Հայաստանում այսօր բազմաթիվ են բնապահպանական մարտահրավերները. բնական ռեսուրսների գերշահագործում, շրջակա միջավայրի աղտոտում, ապօրինի անտառահատումներ, Սևանա լճի ճահճացում, ջրային ռեսուրսների ու թափոնների վատ կառավարում: Հայաստանի բնապահպանական մարտահրավերները գերմանացի լրագրողներին ներկայացրեց ԷկոԼուրի փորձագետ Վիկտորյա Բուռնազյանը` «ԷկոԼուր» մամուլի ակումբում նոյեմբերի 6-ին տեղի ունեցած հանդիպման ժամանակ:

Գերմանացի լրագրողները Հայաստան են ժամանել Եվրամիության Արևելյան գործընկերության քաղաքացիական հասարակության ֆորումի Հայաստանի ազգային պլատֆորմի քարտուղարության և գերմանական «Deutsche Gesellschaft» հասարակական կազմակերպության հետ համատեղ իրականացվող «Լրագրողների փոխանակման գերմանահայկական ֆորում» ծրագրի շրջանակներում, որը ֆինանսավորվում է Գերմանիայի Արտաքին գործերի նախարարության կողմից:

Թիվ 1 մարտահրավերը Հայաստանում հանքարդյունաբերական գործունեության բացասական ազդեցությունն է էկոլոգիական և սոցիալական վիճակի վրա: Նշվեց, որ հանքարդյունաբերական գործունեության արդյունքում աղտոտվում են Հայաստանի գետերը, հողերը, գյուղմթերքը, ոչնչանում են կանաչ գոտիները, տեղի բնակիչները կորցնում են գյուղատնտեսական նշանակության հողերը, բողոքում են առողջական խնդիրներից:

Ներկայացվեցին Քաջարանի պղնձամոլիբդենային հանքավայրի և Ամուլսարի ոսկեբեր քվարցիտների հանքավայրի շահագործման ծրագրերը:

Հիմնական հարցն այն է, թե ինչով է արտահայտվում «Զանգեզուրի պղնձամոլիբդենային կոմբինատ»-ի, որի բաժնետոմսերի 70 տոկոսից ավելին պատկանում է գերմանական «Cronimet Holding» ընկերությանը, գործունեության բացասական ազդեցությունը:
Պատասխան՝ շրջակա միջավայրի աղտոտում Արծվանիկի պոչատարի վթարների և պոչամբարից արտահոսքերի արդյունքում, հանքավայրից եկող ծանր մետաղներ պարունակող փոշով աղտոտում, պոչամբարի տարածքում և լցակույտերի տարածքում կանաչ գոտիների ոչնչացում, գյուղատնտեսական նշանակության հողերի կորուստ գյուղմթերքի ծավալների նվազում և շուկայում անմրցունակություն:

Լրագրողները հետաքրքրվեցին նաև Ամուլսարի ոսկեբեր քվարցիտների հանքավայրի շահագործման ծրագրի շուրջ ստեղծված իրավիճակով: Քննարկվեցին վերջին իրադարձությունները` կապված քաղհասարակության ընդվզման և Քննչական կոմիտեում Ամուլսարի ծրագրի վերաբերյալ քրեական գործի վերաբերյալ, տեղի բնակիչների կողմից Ամուլսարի ծրագրի տարածք տանող ճանապարհների փակման պատճառները, պաշտոնական և անկախ փորձագետների եզրակացությունները Ամուլսարի ծրագրի ՇՄԱԳ-ի վերաբերյալ:

Մյուս մարտահրավերը կապված է Սևանա լճի էկոհամակարգին սպառնացող վտանգների հետ: Սևանա լճի ճահճացումը սպառնում է Հայաստանի ռազմավարական նշանակության ջրային օբյեկտի անդառնալի կորստով: Լճի ճահճացումը պայմանավորված է
բնակավայրերից և ժամանցի և սպասարկման օբյեկտներից լիճ կեղտաջրերի հոսքով, Սևանա լճում զարգացող ցանցավանդակային ձկնաբուծությունից ֆոսֆորի և ազոտի կուտակմամբ, լճում ջրածածկ և ափամերձ անտառաշերտից օրգանական նյութերի կուտակմամբ, չարդարացված մեծ քանակությամբ լճից ջրառով:

Լրագրողներին ներկայացվեց նաև Հայաստանի անտառների հետ կապված խնդիրները՝ ապօրինի անտառահատումները, անտառվերականգնման աշխատանքների թույլ կառավարումը, անտառածածկ տարածքների նվազումը անտառային հողերի կատեգորիաների փոփոխման արդյունքում:

Գերմանացի լրագրողները ծրագրի շրջանակներում կպատրաստեն հոդվածներ:

Նոյեմբեր 13, 2019 at 16:01