Հանքարդյունաբերությանն ազդակիր բնակավայրերն ընդերքօգտագործողների վճարած ռոյալթիի 2%-ի չափով մասհանումները կստանան 2024թ. հունվարի 1-ից: Այս մասին ԷկոԼուրին հայտնեցին Տարածքային կառավարման և ենթակառուցվածքների նախարարությունից:
Նշենք, որ 2022թ. ՀՀ Ազգային ժողովն ընդունեց ՀՀ տարածքային կառավարման և ենթակառուցվածքների նախարարության մշակած «Հայաստանի Հանրապետության բյուջետային համակարգի մասին» օրենքում լրացումներ կատարելու մասին» և «Տեղական ինքնակառավարման մասին» օրենքում լրացում կատարելու մասին» օրենքների նախագծերը, որոնցով կարգավորվում է ռոյալթիից ստացված մասհանումների բաշխումը: Օրենսդրական փոփոխությունն ուժի մեջ է մտել սույն թվականի հունվարի 1-ից: Օրենքից օգտվելու հնարավորություն ունեցող ազդակիր բնակավայրերի ցանկը սահմանելու է լիազոր մարմինը: Նախնական հաշվարկներով դրանք 23-ն են:
Օրենսդրական փոփոխությամբ ռոյալթիից մասհանումը պետք է բաշխվի տվյալ հանքարդյունահանող ընկերության հանքի ազդակիր համայնքի ազդակիր բնակավայրերի և Հայաստանում ռոյալթի վճարող այլ հանքարդյունահանող ընկերությունների կողմից շահագործվող հանքերի ազդակիր բնակավայրերի միջև` 50/50 հարաբերակցությամբ։
ՀՀ կառավարությունը 2022թ. սեպտեմբերի 1-ի Ն 1370 որոշմամբ սահմանել է hամայնքային մասհանումների ծախսման ծրագրով նախատեսված միջոցառումների ուղղությունները, որոնք են.
1) գյուղատնտեսություն
2) կրթություն և գիտություն
3) առողջապահություն
4) սոցիալական ապահովություն
5) մշակույթ, սպորտ և երիտասարդության զբաղվածություն
6) քաղաքաշինություն
7) ջրամատակարարում և ջրահեռացում
8) տրանսպորտ և ճանապարհաշինություն
9) զբոսաշրջություն:
Փետրվար 08, 2023 at 14:57