ԷկոԼուր
Լոռու մարզի Շնող համայնքի բնակիչներն իրենց հողատարածքները ոռոգում են հանքարդյունաբերական թափոններով աղտոտվող Դեբեդ և Շնող գետերի ջրով:
Շնող գետն աղտոտվում է Թեղուտի պղնձամոլիբդենային հանքավայրի արտադրական կեղտաջրերով: 2014թ-ից սկսած ՀՀ բնապահպանության նախարարության «Շրջակա միջավայրի վրա ներգործության մոնիտորինգի կենտրոն» ՊՈԱԿ-ի տվյալներով՝ Շնող գետի ջուրը դարձել է 5-րդ դասի ամենավատ որակի:
Դեբեդ գետը Հայաստանի տարածքում արտադրական թափոններով աղտոտում են Ախթալայի լեռնահարստացուցիչ ֆաբրիկան եւ Ալավերդու պղնձաձուլային կոմբինատը: «Դեբեդ գետի մեջ շաբաթական մեկ-երկու անգամ պոչամբարից (Ախթալայի լեռնահարստացուցիչ կոմբինատ) բացթողումներ են լինում, իսկ մենք մեր հողերը հիմնականում Դեբեդի ջրով ենք ոռոգում: Գիշերը ջուրը բաց ենք թողնում, որ ոռոգում լինի, առավոտյան մոտ մի 2-3 սմ էդ պոչամբարից պոչ է նստած լինում, փչանում է բերքը», - ահազանգում է Շնողի համայնքապետի տեղակալ Կորյուն Շադինյանը՝ նշելով, որ գյուղի մեծ մասը ոռոգում իրականացնում է Դեբեդ գետի ջրով, իսկ Շնող գետից օգտվողները քիչ տոկոս են կազմում:
Կորյուն Շադինյանը հայտնեց, որ արդեն երկու տարի «Թեղուտ» ընկերությունը փորձանմուշներ է վերցնում համայնքի բերքից և լաբորատոր փորձաքննություն անցկացնում: «Ծանր մետաղների պարունակությունը պտղի մեջ արդեն մի քանի անգամ գերազանցում է: Դա կապված է հիմնականում Ալավերդու պղնձաձուլարանի, Ախթալայի ֆաբրիկայի հետ», - ասում է Կորյուն Շադինյանը:
Ծանր մետաղները սննդային շղթայով անցնում են մարդու օրգանիզմ: Ըստ մասնագետների դրանք քաղցկեղածին են:
Նոյեմբեր 01, 2016 at 16:23