Մինչև 2030թ․ Հայաստանում նախատեսվում է ներդնել կենսաբազմազանությանը նպաստող գյուղատնտեսական կառավարման մոտեցումներ, ապահովել արոտավայրերի կայուն կառավարումը, ընդլայնել օրգանական գյուղատնտեսությունը և զարգացնել գյուղատնտեսական խորհրդատվական ծառայությունները։
Այս նպատակներն ամրագրված են ՀՀ շրջակա միջավայրի նախարար Համբարձում Մաթևոսյանի՝ «Հայաստանի Հանրապետության կենսաբանական բազմազանության պահպանության նպատակները և 2026-2030 թվականների գործողությունների ծրագիրը հաստատելու մասին» N100-Լ հրամանում։
Գյուղատնտեսության բաղադրիչն արտացոլված է Գործողությունների ծրագրի 12-րդ թիրախում։ Թիրախի շրջանակում նախատեսվում է մինչև 2030թ․ ապահովել արոտավայրերի և խոտհարքների կայուն կառավարումն առնվազն 150 հազար հեկտար տարածքում։
Բացի այդ, 2026-2028թթ․ նախատեսվում է վերլուծել և լրամշակել գյուղատնտեսության ոլորտի ռազմավարական փաստաթղթերում կենսաբազմազանության պահպանությանն ուղղված գործողությունները։
Ծրագրով նախատեսվում է նաև մինչև 2030թ․ ապահովել վարելահողերի առնվազն 0.04 տոկոսի օրգանական մշակումը, ինչպես նաև գյուղատնտեսական հողերի առնվազն 0.01 տոկոսի կառավարումը կենսաբազմազանությունը խթանող օրգանական գյուղատնտեսության սկզբունքներով՝ ներառյալ ագրոանտառաբուծության զարգացումը։
Թիրախի շրջանակում նախատեսվում է նաև մշակել թվային հարթակ և բջջային հավելված, ինչպես նաև առնվազն մեկ խոշորացված համայնքում իրականացնել պիլոտային ծրագիր՝ Հայաստանում գյուղատնտեսական խորհրդատվական ծառայության փորձարկման և զարգացման նպատակով։ Ծառայությունը միտված է խթանելու կենսաբազմազանությանը նպաստող գյուղատնտեսական պրակտիկաների կիրառումը։
Հուլիս 20, 2026 at 14:00