

ԷկոԼուր
ՀՀ բնապահպանության նախարար Արամ Հարությունյանի հրամանով ստեղծվել է հանձնաժողով` Արարատի և Արմավիրի մարզերում ձկնաբուծության համար ջրային ռեսուրսների օգտագործման հետ կապված խնդիրների ուսումնասիրման նպատակով: Այս մասին տեղեկացնում է ՀՀ բնապահպանության նախարարության տեղեկատվության և հասարակայնության հետ կապերի վարչությունը:
Հրամանով ստեղծվել է նաև վերոհիշյալ մարզերում ձկնաբուծական նպատակով օգտագործվող խորքային հորերի ժամկետանց ջրօգտագործման թույլտվությունների շուրջ ստեղծված իրավիճակը և խորքային հորերի մոնիթորինգի ավտոմատ համակարգի ներդրման հնարավորությունն ուսումնասիրող աշխատանքային խումբ: Ինչպես նաև ձևավորվել են աշխատանքային խմբեր, որոնք կազմակերպելու են Արարատի և Արմավիրի մարզերում ձկնաբուծական նպատակով առանց ջրօգտագործման թույլտվության օգտագործվող խորքային հորերի լուծարումը:
Հաստատվել է Հանձնաժողովի և աշխատանքային խմբերի աշխատանքների իրականացման ժամանակացույցը:
Նախարարը վերոհիշյալ հրամանի կատարման հսկողությունը վերապահել է իրեն և Հանձնաժողովին հանձնարարել յուրաքանչյուր երկուշաբթի ներկայացնել տեղեկատվություն աշխատանքների ընթացքի վերաբերյալ:
Սեպտեմբեր 13, 2013 at 17:10
