ԷկոԼուր
ՀՀ բնապահպանության նախարար Արծվիկ Մինասյանն ընդունել է Անդրսահմանային միացյալ քարտուղարության /TJS/ ծրագրի ազգային համակարգող Կարեն Կարապետյանին:
Ողջունելով TJS ծրագրի ազգային համակարգողին` ՀՀ բնապահպանության նախարարը կարևորել է միջազգային բնապահպանական ծրագրերի միջոցով Հայաստանում իրականացվող աշխատանքները, շեշտել դրանց նպատակայնության և արդյունքների չափելիության բարձրացման անհրաժեշտությունը:
Անդրսահմանային միացյալ քարտուղարության /TJS/ ծրագրի ազգային համակարգող Կարեն Կարապետյանը շնորհակալություն է հայտնել հանդիպման համար և ներկայացրել ծրագրի շրջանակներում իրականացված և հեռանկարային աշխատանքները:
Կողմերը քննարկել են բնապահպանական խնդիրների լայն շրջանակ` առանձնակի ուշադրություն դարձնելով էկոտուրիզմի խնդիրներին, բնության հուշարձաններին և տարածաշրջանային համագործակցությանը: Քննարկման արդյունքում կարևորվել են բնության հատուկ պահպանվող տարածքներն էկոտուրիզմի համաշխարհային շուկայում ներկայացնելու մեխանիզմները, էկոտուրիզմի զարգացման ազգային ծրագրի մշակումը, ինչպես նաև Վրաստանի և Իրանի Իսլամական Հանրապետության հետ Հայաստանի էկոտուրիստական միջանցքների ստեղծման հնարավորությունները:
Պայմանավորվածություն է ձեռք բերվել հետագա հանդիպումների միջոցով ՀՀ բնապահպանության նախարարության համապատասխան ստորաբաժանումների մասնագետների հետ համատեղ քննարկել Անդրսահմանային միացյալ քարտուղարության /TJS/ ծրագրով նախատեսված միջոցառումների վերաբաշխման հնարավորությունները` դրանք առավել նպատակային և առաջնային խնդիրների լուծմանն ուղղելու նպատակով:
Այս մասին հայտնում է ՀՀ բնապահպանության նախարարության տեղեկատվության և հասարակայնության հետ կապերի վարչությունը:
Հոկտեմբեր 27, 2016 at 15:48