ԷկոԼուր
ՀՀ բնապահպանության նախարար Արծվիկ Մինասյանի մոտ տեղի է ուենցել աշխատանքային քննարկում Հայաստանում գործող բնապահպանական տեղեկատվության հասարակական Օրհուս կենտրոնները պետական կառավարմանը հանձնելու վերաբերյալ:Այս մասին հայտնում է ՀՀ բնապահպանության նախարարության տեղեկատվության և հասարակայնության հետ կապերի վարչությունը:
ԵԱՀԿ երևանյան գրասենյակի շրջակա միջավայրի հարցերով ազգային ծրագրերի պատասխանատու Գոհար Ղազինյանը ներկայացրել է Օրհուս կենտրոնների ձևավորման ընթացքը և կատարած աշխատանքները: 2002 թվականին ԵԱՀԿ երևանյան գրասենյակը ՀՀ բնապահպանության նախարարության հետ համատեղ ստորագրված հուշագրի շրջանակում ստեղծել են Երևանի Օրհուս կենտրոնը, ինչին հաջորդել է նաև Հայաստանի մարզերում ևս 14 կենտրոնի ստեղծումը: Բանախոսը հայտնել է, որ կենտրոնների հիմնական գործառույթը եղել է Շրջակա միջավայրի հարցերի առնչությամբ տեղեկատվության մատչելիության, որոշումների ընդունման գործընթացին հասարակայնության մասնակցության եվ արդարադատության մատչելիության մասին կոնվենցիայով /Օրհուսի կոնվենցիա/ Հայաստանի ստանձնած պարտավորությունների կատարմանը նպաստելը, այն է` բնապահպանական խնդիրների վերաբերյալ հանրային իրազեկվածության մակարդակի բարձրացումը և որոշումների կայացման գործընթացներին հասարակության մասնակցության խթանումը: Ներկայացվել են կենտրոնների գործունեության արդյունքները, ինչը պարբերաբար բարձր է գնահատվել նաև միջազգային կառույցների կողմից:
Կարևորելով կենտրոնների աշխատանքների շարունակականությունը և նպատակայնության բարձրացումը` հանդիպմանը քննարկվել է Օրհուս կենտրոնները պետական կառավարմանը հանձնելու մեխանիզմները, ինչն ամրագրված է նաև երկկողմ հուշագրում:
ՀՀ բնապահպանության նախարար Արծվիկ Մինասյանն առաջնային է համարել այդ գործընթացի համակարգային լուծման անհրաժեշտությունը, ինչն իր հերթին կնպաստի կենտրոնների աշխատանքների արդյունավետության բարձրացմանը: Քննարկման արդյունքում որոշվել է, որ Օրհուս կենտրոնների նոր կարգավիճակի հարցը հստակեցնելու համար պետք է վերջիններիս վերաբերյալ ՀՀ բնապահպանության նախարարության և ԵԱՀԿ երևանյան գրասենյակի հետ նոր հուշագիր մշակել` որում կսահմանվեն կողմերի լիազորությունները, համաֆինանսավորման մեխանիզմները:
ՀՀ բնապահպանության նախարարը հանձնարարել է սեղմ ժամկետում ներկայացնել համագործակցության հուշագրի նոր նախագիծ` հստակեցնելով Օրհուս կենտրոնների կարգավիճակը և գործունեության սկզբունքները, ինչպես նաև կողմերի պարտավորությունները:
Դեկտեմբեր 28, 2016 at 17:38