ԷկոԼուր
ՀՀ բնապահպանության նախարար
պարոն Արամ Հարությունյանին
Հարցում
«ԷկոԼուր» տեղեկատվական ՀԿ-ն բավարարված չէ ՀՀ բնապահպանության նախարարության պատասխանից` կապված ԷկոԼուրի հարցմանը Սոտքի ոսկու հանքավայրում հոկտեմբերի 27-ին Վ.Սաղաթելյանի մահվան դեպքի հետ: Հանքավայրը շահագործում է «GeoProMining Gold» ՓԲԸ-ն: 13.11.2013թ-ի N5/12/.1/53616 նամակում ասված է, որ հարցումը վերաբերում է ոչ թե Բնապահպանության նախարարությանը, այլ ուրիշ մարմինների: Հիշեցնենք, որ Սոտքի հանքավայրի շահագործումը պետք է իրականացվի բնապահպանական նորմերին համապատասխան, որի ցանկում մտնում են շահագործած հանքերի հողաբարելավումը և այլ միջոցառումներ, որոնց նպատակն է հանքավայրի բաց և փակ շահագործման հետևանքների նվազեցումը: Դա նախատեսված է «Ընդերքի մասին» ՀՀ օրենքով, մասնավորապես. հոդված 5-րդ` «Բնակչության անվտանգության, բնության ու շրջակա միջավայրի անվտանգության ապահովումը», հոդված 64-րդ` «Ընդերքօգտագործման ընթացքում բնության և շրջակա միջավայրի պահպանության պահանջները և պայմանները», հոդված 70-րդ` «Բնապահպանական աշխատանքներ (այդ թվում` հողաբարելավման)», հոդված 72-րդ` «Պետական վերահսկողության խնդիրները ընդերքի օգտագործման եւ պահպանության վերաբերյալ»:
Հաշվի առնելով այն փաստը, որ հանքավայրում մարդ է մահացել, չի բացառվում, որ բնակչության անվտանգությունը ապահովված չի եղել` կապված այն հանգամանքով, որ շահագործված հանքերը չեն լցվում լցակույտերով, իսկ բնապահպանական միջոցառումների և հողաբարելավումների պլանը չի իրականացվում: Այս կապակցությամբ խնդրում ենք հաղորդել, երբ են անցկացվել բնապահպանական ստուգումներ` պարզելու «GeoProMining Gold» ընկերության բնապահպանական միջոցառումների պլանի համապատասխանությունը առկա իրավիճակին եւ հանքաքարի արդյունահանման տեմպերին, և շահագործված հանքերում ինչ ծավալով են իրականացվել հողաբարելավման աշխատանքներ:
Նոյեմբեր 26, 2013 at 10:13