ՍԵՎԱՆԻ ՍԻԳԸ ՈՐՍԱԳՈՂՈՒԹՅԱՆ ԽԻՍՏ ՃՆՇՄԱՆ ՏԱԿ Է, ՆՇՈՒՄ ԵՆ ՌՈՒՍԱՍՏԱՆՑԻ ՄԱՍՆԱԳԵՏՆԵՐԸ

ՍԵՎԱՆԻ ՍԻԳԸ ՈՐՍԱԳՈՂՈՒԹՅԱՆ ԽԻՍՏ ՃՆՇՄԱՆ ՏԱԿ Է, ՆՇՈՒՄ ԵՆ ՌՈՒՍԱՍՏԱՆՑԻ ՄԱՍՆԱԳԵՏՆԵՐԸ

Արմինֆո

Սևանի սիգը որսագողության խիստ ճնշման տակ է, հայտարարել է Ռուսաստանի ԳԱ Ներքին ջրերի կենսաբանության ինստիտուտի ձկների էկոլոգիայի լաբորատորիայի վարիչ Յուրի Գերասիմովը դեկտեմբերի 8-ին կայացած մամուլի ասուլիսում:

Նրա հավաստմամբ, այժմ ձկների պոպուլյացիայի վրա բացասաբար անդրադարձող գլխավոր գործոնը որսագողությունն է, և եթե պահպանության միջոցներ չձեռնարկվեն, ապա Սևանի սիգն ու իշխանը կարող են անհետանալ: Գերասիմովը նշել է, որ ձկները հեշտությամբ որսագողերի ավար են դառնում բեղմնավորման շրջանում էլեկտրաորսի արդյունքում: Նրա ասելով` հոկտեմբերին ռուսաստանցի մասնագետները հետազոտություն են անցկացրել Սևան թափվող գետերում, որտեղ, հիմնականում, ձկնկիթ են դնում ձկները: Արդյունքներն անմխիթար են. գետերում, որտեղ նախկինում իշխան էր հանդիպում, այդ ձկնատեսակն արդեն բացակայում է:

Ռուսաստանցի մասնագետների գնահատմամբ, Սևանի ծածանը, սիգը և այլ ձկնատեսակներ կարող են բնական ճանապարհով վերականգնել իրենց պոպուլյացիան, սակայն, միայն այն դեպքում, եթե մի քանի տարի լճում ու գետերում խիստ պայքար մղվի որսագողության դեմ: Սիգի վերականգնման համար, որի պաշարներն արդեն մի քանի տարի ծայրահեղ ցածր մակարդակում են (170-180 տոննա), Գերասիմովի ասելով, անհրաժեշտ է 3-4 տարի:

Ինչպես նշել է ՀՀ ԳԱԱ Հիդրոէկոլոգիայի և ձկնաբանության ինստիտուտի տնօրեն Բարդուխ Գաբրիելյանը, ռուսական կողմի հետ համագործակցությունը Սևանի էկոհամակարգի ուսումնասիրման առումով կշարունակվի: Մասնավորապես, նախատեսվում է անցկացնել իշխանի գենետիկական անալիզ, ինչը թույլ կտա բացահայտել մաքուր տեսակի և խառնուրդի հարաբերակցությունը:

Ավելացնենք, որ վերջերս Ռուսաստանում լույս է տեսել «Սևանա լճի էկոլոգիան դրա մակարդակի բարձրացման շրջանում», որը ներառում է 2005-2009 թթ. Սևանա լճի հիդրոէկոլոգիական հետազոտման ռուս-հայկական արշավախմբի հետազոտության արդյունքները:

Դեկտեմբեր 09, 2010


Առնչվող նյութեր


Կատեգորիա

ավելին
պակաս

Մարզեր