

ԱՐՄԵՆՊՐԵՍ
«Սեւան» ազգային պարկի Նորատուսի տեղամասի ափամերձ անտառածածկ տարածքների մաքրման աշխատանքները շարունակվում են: Դրանք սկսվել են սեպտեմբերի 1-ից եւ իրականացվում են «Տրիգրեն» ՍՊԸ-ի կողմից: Միաժամանակ աշխատանքներ են ընթանում նաեւ Սեւանի ու Արտանիշի տեղամասերում. արդեն մաքրվել է շուրջ 120 հա, որից 30 հա` ճահճացած, 20-ը` ջրածածկ, մնացածը` ցամաքային:
Նորատուսի տեղամասում նախատեսված է մաքրել 229.1 հա տարածք, իսկ Սեւանի ու Արտանիշի տեղամասերում միասին` 96.5: Բոլոր տեղամասերում աշխատում է մոտ 100 մարդ եւ 15 միավոր տեխնիկա, այդ թվում` T-130 եւ T-170 տրակտորներ, ամբարձիչներ, տարբեր տիպի տեղափոխող մեքենաներ: Ամբողջովին արմատախիլ են արվել վերաճ տված բարդիները, ակացիաները, ուռենիները եւ չիչխանը: Առաջացած վառելափայտը, շինափայտը հանձնվում է «Սեւան» ազգային պարկի տնօրինությանը: «Սեւան» ազգային պարկի Նորատուսի տեղամասի տնօրեն Նորահույս Պողոսյանը «Արմենպրես»-ին ասաց, որ արդեն կուտակվել է 35 խորանարդ մետր փայտ, մոտավոր հաշվակներով, դեռեւս կստացվի 840 խմ, որի մի մասը, հիմնականում` վառելափայտը եւ շինափայտը, կվաճառվի:
«Տրիգրեն» ՍՊԸ աշխղեկ Արտակ Վանյանի հավաստմամբ` նախատեսված է ապահովել ծովի մակարդակից 1900 մետր բարձրության նիշի ջրածածկման վտանգի տակ գտնվող տարածքների մաքրումը ծառերից, թփերից եւ բուսական այլ համակեցություններից: Եթե եղանակային պայմանները թույլ տան, ապա մինչեւ սահմանված ժամկետը` դեկտեմբերի 15-ը, աշխատանքները ավարտին կհասցվեն:
Հոկտեմբեր 09, 2009
