

ԱրմԻնֆո
Սեւանի ավազանում հարստացուցիչ ֆաբրիկայի կառուցման հարցը փակված է: Այդ մասին ԱրմԻնֆոյի թղթակցին հայտնեց ՀՀ նախագահին առընթեր Սեւանի հիմնահարցերի հանձնաժողովի նախագահ Վլադիմիր Մովսիսյանը:
Հիշեցնենք, որ ֆաբրիկա կառուցելու գաղափարը պատկանում էր «GeoProMining» ընկերությանը, որի ղեկավարությունը բանակցություններ էր վարում բարձր մակարդակով: Չնայած նրան, որ Սեւանի ավազանում նման գործունեությունն արգելված է օրենքով, «GPM»-ը, ղեկավարվելով սեփական տնտեսական շահերով եւ անընդմեջ հայտարարելով ինչպես Արարատում, այնպես էլ Գագարինում ֆաբրիկայի կառուցման անեկամտաբերության մասին, մեկ տարուց ավելի պնդում էր, որպեսզի իրականացվի արտադրությունը Սոտքի ոսկու հանքավայրի շրջան տեղափոխելու նախագիծը:
«GPM»-ի «սեւանյան ախորժակի» արդյունքը դարձավ «SOS Սեւան» մեծամասշաբ կամպանիան, որին միացան կազմակերպություններ ԱՄՆ-ից, Մեծ Բրիտանիայից, Մեքսիկայից, Վենեսուելայից, Ղրղզստանից, Բուլղարիայից, Ուռուգվայից: Կամպանիայի շրջանակներում այս տարվա գարնանը ՀՀ նախագահ Սերժ Սարգսյանին բաց նամակ ուղարկվեց, որում հասարակական կազմակերպությունները կոչ էին անում կանգնեցնել «GeoProMining»-ի հակաօրինական գործունեությունը: Նամակում մասնավորապես նշված է, որ ֆաբրիկայի կառուցման արդյունքը կլինեն 100 միլիոն տոննա թունավոր թափոնները, պոչամբարը` թունավորված ցիանային միացություններով եւ ծանր մետաղներով, որոնք կլցվեն լճի գրունտային ջրերի մեջ:
«Սկզբից էլ պարզ էր, որ իր նախագծով «GeoProMining» ընկերությունը նպատակ էր հետապնդում ստանալ գերշահույթ` հանքանյութի տեղափոխման ծախսերը կրճատելու ճանապարհով: Մենք բացատրեցինք ընկերության ղեկավարությանը, որ իրավունք չունենք ռիսկի տակ դնել Սեւանա լիճը, եւ ես ուրախ եմ, որ նրանք համաձայնեցին մեզ հետ: Ցանկանում եմ շնորհակալություն հայտնել Հայաստանի նախագահ Սերժ Սարգսյանին, քանի որ հենց նա ասաց որոշիչ խոսքն այս հարցում»,- նշեց Վ. Մովսիսյանը:
Նոյեմբեր 12, 2009
