ԷկոԼուր
Գեղարքունիքի մարզի Աստղաձոր համայնքի բնակիչները 32 ստորագրությամբ դիմում-նամակ են ուղարկել ՀՀ գլխավոր դատախազ Արթուր Դավթյանին՝ ջրի նկատմամբ իրենց խախտված իրավունքը վերականգնելու խնդրանքով:
Բնակիչների նամակում նշված է.
«Հարգելի դատախազ,
տեղեկացնում ենք, որ դեռևս 1828-30-ական թթ-ից ի վեր հիմնադրվել է ներկայիս ՀՀ Գեղարքունիքի մարզի Աստղաձոր գյուղը, որի հիմնադրման հիմնական պատճառներից մեկը հանդիսացել է Աստղաձոր գետը, որի ջրերը բնակչության կենսագործունեության համար էական նշանակություն են ունեցել և օգտագործվել են ինչպես խմելու, այնպես էլ ոռոգման համար: Հետագայում Աստղաձոր գետից օգտվել է նաև Զոլաքար համայնքը:
Ժամանակի ընթացքում, կլիմայի փոփոխության հետևանքով, պակասել է գետի ջուրը, որն էլ ամբողջությամբ վերջին տարիներին՝«Համայնքների գյուղատնտեսական ռեսուրսների կառավարման և մրցունակության» (ջրարբիացում) և «Ենթակառուցվածքների և գյուղական ֆինանսավորման աջակցության» («Գռան» և «Մեծձորի թմբան տակ» կոչվող չորս բնական աղբյուրներից՝ 23.1 լ. վրկ. ջրառ իրականացնելու համար ՀՀ բնապահպանության նախարարությունը 15.04.2016 թ-ին տվել է թիվ 000078 թույլտվությունը) ծրագրերի իրականացման արդյունքում տեղափոխվել է Զոլաքար համայնք: Այդ իսկ պատճառով Աստղաձոր համայնքը զրկվել է ջրից, ինչի հետևանքով էլ լուրջ խնդիրներ են ծագել երկուհամայնքների միջև:
Ծրագրերի նախագծման և իրականացման ընթացքում հաշվի չեն առնվել Աստղաձոր համայնքի շահերը և ոտնահարվել է ջրի նկատմամբ ունեցած ազգաբնակչության իրավունքները՝ չեն եղել քննարկումներ և հանրային լսումներ: Աստղաձոր գետից և ակունքներից Զոլաքար համայնքին տրամադրված ջրամատակարարման բոլոր թույլտվությունները կատարվել են օրենքների կոպիտ խախտումներով և Զոլաքար համայնքի կողմից տրամադրված սուտ տեղեկությունների հիման վրա: Չեն համապատասխանում նախնական գրությունները և պահանջը վերջնական արդյունքներիհետ:
Ելնելով հարցի կարևորությունից և հրատապությունից՝ հետագայում անցանկալի ու անկանխատեսելի հետևանքները կանխելու համար, խնդրում ենք Ձեզ քննություն իրականացնել՝ բացահայտելու այն բոլոր անօրինականություններն ու չարաշահումները, որոնք հնարավորություն կտան Աստղաձոր համայնքին վերադարձնելու սեփական ջուր»:
Նոյեմբեր 13, 2018 at 14:41