ԷկոԼուր
«ԷկոԼուր»-ը նոր ահազանգ ստացավ Ջերմուկից: Տեղի ակտիվիստների դիտարկումների համաձայն` Արփա գետի վրա փոքր ՀԷԿ-ի կառուցման վայրում արդեն սկսել են փոխել գետի հունը: «5-6 մեքենաներով մարդիկ եկան, փոխեցին գետի լանդշաֆտը, հեռացրեցին քարերը, ափերը նեղացրեցին, ծառեր հատեցին»: «ԷկոԼուր»-ի բլոգում Թեհմինե Ենոքյանը գրում է. «Առավոտյան ահազանգ ստացվեց Ջերմուկից, որ կիրակի օրը ՀԷԿ կառուցող մարդիկ բերել են ծանր տեխնիկա և արդեն Արփայի հունը փակել են: Երկու շաբաթ առաջ «Ջերմուկի զարգացման կենտրոն» ՀԿ-ն պաշտոնապես գրել է Բնապահպանության նախարարությանը, և ոչ մի պատասխան մինչ այս պահը չի ստացվել: Ես` որպես լրագրող, ահազանգեցի Բնապահպանության նախարարության թեժ գծին` պատասխանը հետևյալն էր` դիմեք ջրային ռեսուրսների կադաստր:
Հարցերս հետևյալն էին` ի՞նչ ընկերություն է այդ տարածքում գործունեություն ծավալում, Կեչուտի ջրամբարից վերև գտնվող Արփա գետի տարածքը մտնում է ջրաբանական արգելավայրի տարածքի մեջ, որը կազմում է 17 հազար հեկտար, որտե՞ղ են իրավական հիմքերը, իրականացվե՞լ են հասարակական լսումներ, ջերմուկցիներն այս մասին ոչինչ չգիտեն:
Ջրային ռեսուրսների կադաստրում ասացին` պաշտոնապես դիմեք, մենք կպատասխանենք, դե երևի ունեն իրավունք ու թույլտվություն, որ նման գործունեություն են ծավալում:
Հարցը մնաց «դե երևի» մակարդակում:
Կրկին զանգահարեցի Բնապահապանության նախարարության թեժ գիծ ու խնդրեցի ահազանգ գրանցել: Ահազանգն ընդունվեց: «Մենք հիմա կտեղեկացնենք Վայոց Ձորի բնապահապանության տեսչությանը, թող իրենք պարզեն»:
ՀՀ Բնապահպանության նախարարության աշխատակազմի բնապահպանական պետական տեսչության Վայոց Ձորի տարածքային բաժնի պետ` Վահիկ Գրիգորյանն ասաց.
«Կազմակերպության անունը չեմ հիշում. այնքան շատ են: Իրենք 5 տարի առաջ են այս ծրագիրն ունեցել, պարզապես հիմա են իրականացնում, իսկ ջրաբանական արգելոցի տարածքում դա չի գտնվում, ջրաբանական արգելոցի տարածքը դրանից վերև ավարտվում է»:
Նույն հարցերս ուղղեցի նաև իրեն.
Դա ի՞նչ կազմակերպություն է, որտե՞ղ են իրավական հիմքերը, կատարվե՞լ են հասարակական լսումներ և որտե՞ղ է արձանագրությունը, ովքե՞ր են մասնակցել հանրային լսումներին:
Խոստացավ զանգահարել և այս հարցերին պատասխանել, սպասենք պատասխանների:
Իսկ մինչ այդ Արփայի հունը փակվում է…»:
«ԷկոԼուր»-ի կողմից ավելացնենք, որ եթե որեւէ գործունեություն, որը ստացել է շրջակա միջավայրի վրա ազդեցության փորձաքննության դրական եզրակացություն, եւ որը չի իրականացվել մեկ տարվա ընթացքում, ապա եզրակացությունը կորցնում է իր ուժը: Հենց սրա վրա պետք է ուշադրություն դարձնեն Բնապահպանության նախարարությունը եւ բնապահպանական տեսչությունը:
Լուսանկարը` Մակեդոն Ալեքսանյանի
Հուլիս 03, 2012 at 14:38