ԷկոԼուր
ՀՀ Գեղարքունիքի մարզի Ներքին Գետաշեն համայնքում ջրի բացակայության պատճառով մշակաբույսերը վառվել են, ծառերը չորացել: Համայնք կատարած այցի ժամանակ բնակիչները ԷկոԼուրին բողոքեցին, որ հուլիսն էլ է անցնում, իսկ իրենց այգիներն այդպես էլ ջուր չեն տեսել:
Ներքին Գետաշենի բնակիչներ.
- Մի փոքր տեղ խմելու ջրով ենք ջրել, տեսեք, այնտեղ կարտոֆիլ է մնացե՞լ, լրիվ չորացել է…
- Ես ունեմ 700 մետր հողատարածք, կեսը կարտոֆիլ է, կեսը՝ լոբի, կեսը՝ կաղամբ, ու չեմ կարողացել ջրել մինչև հիմա, առաջին ջուրը չեմ կարողացել տալ…
- Ամբողջ գիշեր մնացել եմ արթուն, 3 հատ ծառ եմ ջրել, էս տարի իմ ծառերը ջուր չէին տեսել: 
Ոռոգման ջրի աղբյուրն այստեղ Արգիճի գետն է: Ջրամատակարարումն իրականացվում է «Մարտունի» ՋՕԸ-ի միջոցով՝ պոմպերով, ինչպես նաև գյուղացիների կառուցած ջրագծերով՝ ինքնահոս եղանակով: Արգիճի գետի սակավաջրության պատճառով գյուղացիները չեն կարողանում ինքնահոս ջուր հասցնել իրենց այգիներ: Ըստ տեղացիների, ջրառի կետը գտնվում է Արգիճի գետի վրա կառուցված ՓՀԷԿ-ի կայանից վերև, որտեղ դեռ գետը վերցված է ՓՀԷԿ-ի խողովակի մեջ, և գետում մնացած ջուրը քիչ է: 
Ներքին Գետաշենի բնակիչներ.
-ՓՀԷԿ-ի ջուրը գալիս, թափվում է Իշխանատակ, իսկ մեր խողովակը 1 կմ վերև է…
- Ժամանակին Արգիճի գետն այնքան ջուր է եղել, որ ժողովուրդը նեղություն չեն կրել, ոնց էս ՀԷԿ-ը կառուցեցին, ժողովուրդը իրար են ուտում...
- Պապական ջուրն են ուզում ժողովուրդը, գետի ջուրը, որ խողովակով գա, լցվի գյուղի մեջ...
- էս թաղամասում ջուր չկա, վերևի թաղամասերում չկա, ամսի 1-ին եկել եմ ջրբաժանի մոտ` ջուր առնելու, մինչև օրս ջուր չի հասել, կարտոֆիլը հողի վրա չորացել է, ի՞նչ է մտածում կառավարությունը, միայն ընտրությունների մասին, իրենց մասին...
-Երաշտ է, սաղ վառվել է, էլ ինչ Գետաշեն, անունը դնենք Չորաշեն: 
Ներքին Գետաշենի համայնքապետի տեղակալ Հակոբ Վարդանյանն ասաց, որ ջրի խնդիրը վերջին տարիներին ավելի է սրվել: «Եվ գյուղապետարանի, և պետության կողմից խորքային հորեր են մի քանի տեղով խփվել, մի քանի պոմպակայաններ են կառուցվել, բայց չի հերիքում: Վերջին տարիներին էլ կապված Արգիճիի վրա կառուցված ՀԷԿ-ի հետ, նորից խնդիրներ առաջացան, փոխհամաձայնության են եկել, հիմա էս պահին կարծես կարգավորվում է, բայց էլի խնդիրներ կա ջրի հետ կապված», - ասաց Հակոբ Վարդանյանը: Նա նշեց, որ խնդիր կա նաև ջրի կորուստների հետ կապված:
«Մարտունի» ՋՕԸ-ի կողմից սպասարկվող ջրատարները մաշվել են, գյուղացիների հողատարածքներ միայն ջրի փոքր մասն է հասնում: 
Մանրամասները՝ տեսանյութում:
 |
 |
Հուլիս 21, 2017 at 15:45