Լոռու մարզի Խառատանոց գետը շուտով կհոսի բետոնապատ հունով

ԷկոԼուր

Լոռու մարզի Խառատանոց գետը շուտով կհոսի բետոնապատ հունով: Գետի հունը բետոնապատվում է Թեղուտի պղնձամոլիբդենային հանքավայրի շահագործման ծրագրի շրջանակներում: «Թեղուտ» ՓԲԸ-ի գլխավոր տնօրենի տեղակալ Ռուբեն Պապոյանը, պատասխանելով «ԷկոԼուր»-ի հարցին, հայտնեց, որ շարունակվում է երկու գետերի` Խառատանոցի եւ Դուքանաձորի ջրատարի շինարարությունը, որոնց ջրերը պետք է ջրատար ուղղվեն Խառատաձորի կիրճի մոտից: Կիրճը պետք է չորացվի եւ օգտագործվի պոչամբարի համար եւ լցակուտային ապարների համար:

Իրենց հերթին Թեղուտ գյուղի բնակիչներն ասում են, որ շուրջ մեկ ու կես տարի իրենք չեն օգտագործում Շնող գետի ջուրը, քանի որ ջրի որակը փոխվել է:

 «ԷկոԼուր»-ի հետ զրույցում Թեղուտի համայնքապետ Հարություն Մելիքսեթյանն ասաց, որ գյուղը օգտվում է երեք բնական աղբյուրներից:  Երկուսի ջուրը որակյալ խմելու  ջուր է, իսկ երրորդինն օգտագործվում է տեխնիկական նպատակներով:

Ստեփանավան-Նոյեմբերյան խմելու ջրի ջրագիծը, որին գյուղը պետք է մինա, դեռ  Թեղուտ չի հասել:  Սակայն համայնքը ակնկալում էր, որ ջրագիծը Թեղուտ պիտի հասներ դեռ 2010թ. վերջին:

Հունիս 14, 2011 at 16:52