

Մարի Չաքրյան, Հայաստանի Օրհուս կենտրոնների ցանցի տեղեկատվության պատասխանատու, www.aarhus.am
Առաջնորդվելով ՀՀ Սահմանադրությամբ, ՀՀ վավերացրած Օրհուսի համաձայնագրով և «Տեղեկատվության ազատության մասին» ՀՀ օրենքով՝ Գորիսի Օրհուս կենտրոնը մոտ մեկ ամիս առաջ Բնապահպանության նախարարությունից տեղեկատվություն էր խնդրել դեռ 1952-1975թթ. պղնձի հանքավայրի շահագործման արդյունքում Դաստակերտ համայնքի տարածքում գոյացած պոչամբարի վիճակի վերաբերյալ, մասնավորապես ցանկանալով տեղեկանալ, թե այն պարունակում է, արդյոք, ռիսկեր շրջակա միջավայրի համար:
Հարցմանն ի պատասխան Բնապահպանության նախարարության աշխատակազմի ղեկավար է. Փիրումյանը տեղեկացրել է, որ Դաստակերտի պոչամբարում համալիր ուսումնասիրություն է կատարվել 1993թ.: Անհարեժշտությունից դրդված պոչամբարի տարածքում բնապահպանական պետական տեսչության տարածքային բաժնի աշխատակիցները դիտարկումներ են կատարել նաև 2011թ. և պարզել, որ այն շրջանցող ջրանցքի վթարման պատճառով Դաստակերտ գետի ջրերը հոսում են պոչամբարի տարածքով՝ չնշելով, սակայն, թե այս իրավիճակն ինչ և ինչ աստիճանի վտանգներ է պարունակում:
Այլ տեղեկություններ տրամադրելը նախարարության իրավասություններից դուրս համարելով՝ Է. Փիրումյանը տեղեկացրել է նաև, որ 2012թ. ապրիլին ՀՀ արտակարգ իրավիճակների նախարարի ղեկավարությամբ լքված պոչամբարների և դրանց հարող տարածքների քիմիական և երկրաբանական ուսումնասիրությունների միջգերատեսչական աշխատանքային խումբ է ստեղծվել:
Գորիսի Օրհուս կենտրոնն առաջիկայում կդիմի նաև Արտակարգ իրավիճակների նախարարին՝ շրջակա միջավայրի և մարդկանց առողջության համար այս պոչամբարի ներկայացրած վտանգները պարզելու նպատակով:
Հուլիս 26, 2012 at 16:12
