

ԷկոԼուր
Կապանի բնակիչները (Սյունիքի մարզ) նամակ են ուղարկել ՀՀ բնապահպանության նախարարություն, որում մասնավորապես ասված է. «Մեկ անգամ ևս ցանկանում ենք հարց բարձրացնել Սյունիքի մարզի, Ողջի գետի աղտոտման, գետի աղտոտումը կանխելու և նախարարության կողմից գետի աղտոտումը վերացնելու ուղղությամբ իրականացված միջոցների վերաբերյալ:
Հայտնի է, որ Կապան քաղաքի կեղտաջրերի հեռացման համակարգը, մեղմ ասած, «վթարային» վիճակում է գտնվում, այդ իսկ պատճառով կեղտաջրերը թափվում են Ողջի գետ: Այնտեղ է թափվում նաև քաղաքին հարակից խոշոր հանքարդյունաբերական ընկերությունների կեղտաջրերը և արդյունաբերական ջրերը` էական, անվերականգնելի վնաս և աղտոտվածություն պատճառելով Կապան քաղաքի և, մանավանդ, գետի Էկոհամակարգին:
Այս խնդրի վերաբերյալ նախարարությանը բազմիցս դիմել է «Էկոլոգիական անվտանգության ապահովման և ժողովրդավարության զարգացման» հասարակական կազմակերպությունը: Նախարարությունը կազմակերպությանն ուղղված գրություններից մեկում (2010 թ. հունվարի 12-ի, թիվ 023/02 գրություն) նշում է. «փաստերը որոշ չափով համապատասխանում են իրականությանը: Բնապահպանական պետական տեսչության Սյունիքի տարածքային բաժնի կողմից իրականացվում են վերահսկողական աշխատանքներ` Կապանի ջրմուղկոյուղու կողմից խախտումները վերացնելու ուղությամբ իրականացվող միջոցառումների նկատմամբ: Աշխատանքները ավարտվելուց հետո արդյունքների մասին լրացուցիչ կտեղեկացվի Ձեզ»:
Այս գրությունից հետո անցել է արդեն 1,5 տարի սակայն գործնականում ոչ մի բան չի փոխվել, ինչպես նախկինում կեղտաջրերը թափվում էին Ողջի գետը, այնպես էլ մինչ օրս թափվում են: Այստեղից կարող ենք եզրակացնել, որ նախարարությունը անգործություն է ցուցաբերում սույն հարցի կարգավորման վերաբերյալ:
Վերոգրյալից ելնելով և ղեկավարվելով ՀՀ Սահմանադրության 27 և 27.1 հոդվածների և «Տեղեկատվության ազատության» մասին ՀՀ օրենքի 6 հոդվածի դրույթներով` խնդրում ենք տալ հետևյալ տեղեկությունները.
1.2010 թ. հունվար ամսից մինչ օրս նախարարությունը ի՞նչ գործնական քայլեր է ձեռնարկել, որպեսզի կանխվի կեղտաջրերի թափվելը Ողջի գետ
2.2007 թ.-ից մինչ օրս, ո՞ր իրավասու մարմինն է ենթարկվել ՀՀ օրենսդրությամբ սահմանված կարգով պատասխանատվության, և ի՞նչ պարտավորություն է դրվել այդ մարմնի վրա նշված հարցի կարգավորման կապակցությամբ
3.եթե իրավասու մարմինը ենթարկվել է ՀՀ օրենսդրությամբ սահմանված կարգով պատասխանատվության, խնդրում ենք տրամադրել այդ ակտի (ակտերի) պատճեն (ները):
Դիմողներ` Արթուր Բորիկի Ղազարյան, Արշավիր Սերժիկի Խալափյան, Տիգրան Ալյոշայի Գրիգորյան, Արմեն Ռազմիկի Խաչատրյան, Արթուր Հայրապետի Թևանյան»:
Հուլիս 13, 2011 at 11:32
