Դուք վիշապ օձի պես կնստեք ջրագծի բաշխման տեղում եւ գումար կկորզեք գյուղացիներից

Դուք վիշապ օձի պես կնստեք ջրագծի բաշխման տեղում եւ գումար կկորզեք գյուղացիներից

ԷկոԼուր

Մեղրի քաղաքի (Սյունիքի մարզ) Հանրային խորհրդի անունից «ԷկոԼուր»-ին դիմեց Հանրային խորհրդի անդամ Սվետա Գրիգորանը` խնդրելով աջակցել Մեղրիի բնակիչներին Մեղրիի քաղաքապետ Սերգեյ Հայրապետյանի ծրագրերին դիմակայելու հարցում: Ընդ որում, Սվետա Գրիգորյանը հղում արեց քաղաքապետին ուղղված բաց նամակի վրա, որը հրապարակվել է «Սյունաց Երկիր» թերթում (N 18):

«ԷկոԼուր»-ն ավելի վաղ անդրադարձել է այս խնդրին: Խնդիրը վերաբերում է Մեղրի գետի վրա ջրատարների եւ փոքր ՀԷԿ-ի կառուցմանը, ինչի դեմ հանդես եկան Մեղրիի ավելի քան 900 բնակիչներ: Շինարարությունն իրականացվում է Համաշխարհային բանկի վարկային միջոցներով: Մեղրիի Հանրային խորհուրդը մեղադրում է քաղաքապետին, որ նա անձնական շահ է հետապնդում այդ նախագծից եւ անտեսում է բնակչության շահերը:

Բաց նամակում մասնավորապես ասված է. «Ներկայացվող ծրագրի ամենամեծ դավադրությունն այն է, որ մի խումբ մարդիկ (այդ թվում` Դուք) ուզում են մեղրեցուն ոռոգման ջուր վաճառել ու նրան անվանել շահառու:.. Շահառու կարող են լինել այդ ծրագրում ներգրավվածները, ովքեր հանդես են գալու ՍՊԸ-ների, ՓԲԸ եւ ԲԲԸ-ների, ՋՕԸ-ների անվամբ: Եվ սրանք էլ հեքիաթի վիշապ օձի պես նստելու են ջրագծի բաշխման տեղում` գյուղացիներից փող կորզելու համար... Այդ չափերի անվերահսկելիությունն էլ ամրագրված է համաշխարհային կազմակերպությունների կողմից մեր երկրին պարտադրված ջրային օրենսգրքում, որի, օրինակ, 79-րդ հոդվածը մշտական շահույթ ստանալու հնարավորություն է տալիս: Շահույթ ստացողն էլ, որպեսզի (այսպես ասած) ողջամիտ շահույթ ունենա, դրա սահմանն էլ է ինքը որոշելու»,- մասնավորապես ասված է 4 էջանոց նամակում:

Հիշեցնենք, որ դեռ այս տարվա սեպտեմբերինՄեղրիի քաղաքացիների շահերի պաշտպանությամբ հանդես եկան «ԷկոԼուր», «Շողեր միություն» հասարակական կազմակերպությունները եւ Վայրի բնության համաշխարհային հիմնադրամի հայաստանյան գրասենյակը:

Լուսանկարը` «Սյունաց Երկրի»

Նոյեմբեր 04, 2011 at 11:40


Առնչվող նյութեր


Կատեգորիա

ավելին
պակաս

Մարզեր