

ԷկոԼուր
Երեւանում բացվեց «Կանաչ ակումբ», որտեղ կներկայացվեն բնապահպանական ֆիլմեր եւ կանցկացվեն դրանց քննարկումները: Ամեն շաբաթ օր` ժամը 16:30, Թումանյան 40 հասցեում հնարավոր կլինի դիտել հայ և օտարազգի հանրահայտ ռեժիսորների բնապահպանական գործերը, որոնք նվիրված են շրջակա միջավայրի պահպանման էական խնդիրներին:
Առաջին ֆիլմը, որը ցուցադրվեց այս նախագծի շրջանակներում, «Ուրանաֆոբիա»-ն էր (արտադրությունը «ԷկոԼուր»-ի)` նվիրված տեղի բնակչության եւ Հայաստանում ուրանի պաշարների ուսումնասիրությունն իրականացնող «Հայ-ռուսական լեռնահանքային կազմակերպություն» ՓԲԸ-ի շահերի բախմանը:
Մարտի 20-ին կցուցադրվի «Թեղուտ. Զավակների հացը» ֆիլմը (ռեժիսոր` Տիգրան Պասկեւիչյան)` նվիրված Թեղուտի պղնձամոլիբդենային հանքավայրի շահագործումն իրականացնող «Vаllex» խմբի ընկերությունների եւ լայն հասարակայնության շահերի կոնֆլիկտին:
«Կանաչ ակումբ»-ի բացման նախաձեռնությունը պատկանում է Արևորդի միջազգային բնապահպանական փառատոնին, որի գործունեությունը սերտորեն կապված է շրջակա միջավայրի պահպանման ոլորտում երիտասարդական կրթական եւ դաստիարակչական ծրագրերի հետ:
Մարտ 18, 2010
