ԷկոԼուր
ՀՀ կառավարությունը մայիսի 24-ի հերթական նիստի ժամանակ փոխեց անտառային եւ գյուղատնտեսական նշանակության հողերի կատեգորիան` Որոտան գետի վրա 2 փոքր ՀԷԿ-երի կառուցման համար:
Այդ նպատակով Սյունիքի մարզի Սպանդարյան գյուղական համայնքից անտառային հողերից 0.0516 հեկտար և գյուղատնտեսական նշանակության հողերից 0.0484 հեկտար փոխադրվեց էներգետիկայի, կապի, տրանսպորտի, կոմունալ ենթակառուցվածքների օբյեկտների հողերի կատեգորիա, իսկ Անգեղակոթից` 0.1 հեկտար անտառային հող:
Ընդ որում փոքր ՀԷԿ-երը կառուցվելու են միմյանցից ընդամենը 42մ հեռավորության վրա: Սպանդարյանի ՓՀԷԿ-ը գտնվելու է «Որոտան» գետի ձախ ափին` 1810 մետր նիշի վրա, իսկ Անգեղակոթինը` «Որոտան» գետի ձախ ափին` 1768 մետր նիշի վրա:
Երկու փոքր ՀԷԿ-երի նախագծողը Սյունիքի մարզպետ Սուրեն Խաչատրյանն է:
Սպանդարյանի եւ Անգեղակոթի ՓՀԷԿ-երի գործարկման արդյունքում յուրաքանչյուրը տարեկան կարտադրվի 1.82մլն.ԿՎՏ ժամ էլեկտրաէներգիա, համայնքներում կստեղծվեն 4-ական նոր աշխատատեղ: Յուրաանչյուր ՀԷԿ-ի համար կկատարվի 325 միլիոն դրամի ներդրում:
Մայիս 24, 2012 at 18:40