Լոռու մարզի Գուգարք համայնքի բնակիչները կրկին ահազանգում են գյուղի հարևանությամբ տեղակայված քարաղացման արտադրամասի գործունեության հասցրած վնասների մասին: Դեռևս հուլիսի սկզբին բնակիչներն ԷկոԼուրին ահազանգել էին, որ «Ա.Ա.Բ.ՊՐՈԵԿՏ» ՍՊԸ-ին պատկանող քարաղացման և խճի արտադրամասից փոշու արտանետումներն ու աղմուկը խաթարել են իրենց բնականոն կյանքը: Մի քանի օր անց ՀՀ բնապահպանության և ընդերքի տեսչական մարմինն այցելել էր արտադրամաս և մի շարք խախտումներ հայտնաբերել: Պարզվել էր, որ ընկերության գործունեության հետևանքով շրջակա միջավայրին հասցված վնասի չափը կազմել է 4 միլիոն 821 հազար 760 դրամ: Իրականացված վարչական վարույթի արդյունքում նշանակվել էին 200 հազար և 150 հազար դրամի չափով վարչական տուգանքներ։
Սակայն վարչական տուգանքի նշանակումն ու խախտումները վերացնելու մասին պարտադիր կատարման հանձնարարականները խնդիրը չեն լուծել: «Մեզ մոտ ոչինչ չի փոխվել: Չի նվազել աղմուկը: Հակառակն, ավելի շատ են աշխատում, ընդհուպ մինչև գիշերվա ժամը 12-ն ու 1-ը: Հասկանում ենք, որ ցերեկը պետք է աշխատեն, բայց գոնե երեկոյան ու գիշերը հանգիստ լինի: Արտադրամասի աղմուկն անտանելի շատ է խանգարում: Երեխաներն ընդհանարպես քուն չունեն»,- նշեց արտադրամասից մոտ 300 մ հեռավորության վրա ապրող Գուգարքի բնակիչը: Բնակիչները նաև նշեցին, որ պատրաստ են փոխզիջումների գնալ, բայց ընկերությունն էլ պետք է բնակիչների կարծիքը հաշվի առնի: «Օդի մաքրության համար էլ թող համապատասխան ֆիլտրեր տեղադրեն: Փոշին արևային օրերին ավելի շատ է: Գործարանի փոշին վերև է բարձրանում, իսկ մեր գյուղը գտնվում է վերևում», - նշեցին նրանք:
Ըստ բնակիչների՝ առաջին ահազանգից հետո իրենց հրավիրել էին նաև Վանաձորի Սոցիալական ծառայության գրասենյակ՝ ընկերության ներկայացուցիչների հետ հանդիպման, սակայն վերջինները չէին ներկայացել: «Դրանից հետո պատասխան եկավ, որ լուրջ փոփոխություններ կլինեն արտադրամասում, սակայն ոչ մի փոփոխություն չի եղել»,- նշեցին նրանք:
Օգոստոս 04, 2021 at 17:17