Ամուլսարի ոսկեբեր քվարցիտների հանքավայրի շահագործման համար Արփա գետից 41.3 լ/վ ջրաքանակով արդյունաբերական նպատակով ջրառի ջրօգտագործման թույլտվության (ՋԹ) նախագծի մշական մասին արդեն երկրորդ հայտարարությունն է տեղադրվում Շրջակա միջավայրի նախարարության պաշտոնական կայքում հունվար ամսին:
Առաջին հայտարարությունը կայքում տեղադրվեց սույն թվականի հունվարի 5-ին: Փաստաթղթի նախագծի նախնական տարբերակի վերաբերյալ դիտողություններ և առաջարկություններ ներկայացնելու դեպքում փաստաթղթի քննարկումը պետք է տեղի ունենար 2022 թվականի հունվարի 11-ին: Սակայն քննարկում տեղի չունեցավ: ԷկոԼուրին Շրջակա միջավայրի նախարարությունից հայտնեցին, որ այս պահին նման նախագիծ չի մշակվում և չմեկնաբանեցին կայքում հայտարարության հայտնվելը:
Հունվարի 18-ին նախարարության կայքում տեղադրված է նույնաբովանդակ նոր հայտարարություն՝ Ամուլսարի ոսկեբեր քվարցիտների հանքավայրի շահագործման համար Արփա գետից 41.3 լ/վ ջրաքանակով արդյունաբերական նպատակով ջրառի ջրօգտագործման թույլտվության նախագծի մշական մասին: Փոխված են միայն փաստաթղթերին ծանոթանալու և հանրային քննարկման անցկացման օրերն ու ժամը: Այսպիսով՝ փաստաթղթերին կարելի է ծանոթանալ աշխատանքային օրերին ժամը 17:00-ից 18:00-ն՝ դիմելով Շրջակա միջավայրի նախարարության ջրային ռեսուրսների կառավարման և պահպանության մարմին (հասցեն՝ Կառավարական 3-րդ տուն, 5-րդ հարկ):
Փաստաթղթի նախագծի նախնական տարբերակի վերաբերյալ դիտողություններ և առաջարկություններ ներկայացնելու դեպքում փաստաթղթի քննարկումը տեղի կունենա 2022 թվականի հունվարի 24-ին՝ ժամը 16:30-ին (Կառավարական 3-րդ տուն, 5-րդ հարկ, 541 սենյակ):
Հունվար 18, 2022 at 18:00