ԷկոԼուր
2020 թ. հունիսի 10-ին տեղի ունեցավ «Ձկնային պաշարների պահպանումը քաղաքացիների իրազեկության բարձրացման և պետական քաղաքականության բարեփոխումերի միջոցով» ծրագրի առաջին փուլի արդյունքների և հետագա գործողությունների քննարկումը:
«Մասնագիտական կրթության բարեփոխումներ» ՀԿ-ի համանախագահ, ծրագրի համակարգող Սամվել Պիպոյանը և փորձագետ Սևակ Բալոյանը ներկայացրեցին ծրագրի հիմնական նպատակներն ու խնդիրները, քննարկեցին ծրագրի շրջանակներում մշակված նյութերի բովանդակությունը, որոնք նպատակաուղղված են բարեկիրթ սիրողական ձկնորսության կայացմանը: Ըստ Սամվել Պիպոյանի՝ այս նպատակին հասնելու համար անհրաժեշտ է բարձրացնել քաղաքացիների իրազեկվածությունը և բարեփոխումներ կատարել պետական քաղաքականության ոլորտում:
Մասնակիցները քննարկեցին «Ձկների դաշտային ուղեցույց-որոշիչի», «Ձկնորսի հիշատակարան» բուկլետի և «Պարտավոր ենք պահպանել» խորագրով պաստառի ձևաչափն ու բովանդակությունը, որոնք նախատեսված են ձկնորսների, հասարակական կազմակերպություների, ՏԻՄ մարմինների, կրթական հաստատությունների և այլ շահագրգիռ կողմերի համար: Քննարկվեց նաև սիրողական ձկնորսության ոլորտը կարգավորող նորմատիվ ակտերի, այդ թվում նաև սիրողական ձկնորսություն իրականացնելու թույլտվությունն առցանց տրամադրելու կարգը:
Քննարկմանը մասնակցեցին ծրագրի հոգաբարձուների խորհրդի անդամներ՝ Արմեն Մարտիրոսյանը՝ ՄԱԿ-ի Զարգացման ծրագիր (ՄԱԶԾ), Բարդուխ Գաբրիելյանը՝ ՀՀ ԳԱԱ «Հիդրոէկոլոգիայի և ձկնաբանության կենտրոն», Ոսկեհատ Գրիգորյանը՝ Շրջակա միջավայրի նախարարություն, Վարդան Վարդանյանը՝ «Սևան» ազգային պարկ, Կարեն Մանվելյանը՝ WWF ֊ Հայաստան, Արևիկ Հովսեփյանը՝ «Ազգային ջրային համագործակցություն» ՀԿ, Նազելի Վարդանյանը՝ «Հայաստանի անտառներ» ՀԿ, Ինգա Զարաֆյանը՝ «ԷկոԼուր» տեղեկատվական ՀԿ:
Հունիս 10, 2020 at 20:30