Երևանի Վարդավառի լճում անկած ձկների քանակն ավելացել է: Երևանի բնակիչ Էդուարդ Հայրումյանը 2023թ. հունիսի 9-ին հրապարակել է մի տեսանյութ, որում երևում են տասնյակ անկած ձկներ:
«Թոխմախի լճում ձկների զանգվածային անկում է, հենց այս պահին լիճը ողողված է սատկած ձկներով», - գրել է նա:
Հիշեցնենք, որ լճում անկած ձկներ առաջին անգամ հայտնաբերվել էին հունիսի 5-ին:
Ճգնաժամային կառավարման ազգային կենտրոն ահազանգ էր ստացվել, որ Երևանի Վարդավառի լիճը փառակալած է, կան անկած ձկներ։ «Դեպքի վայր է մեկնել Ներքին գործերի նախարարության Փրկարար ծառայության Բնակչության պաշտպանության և աղետների ռիսկի նվազեցման վարչության Ճառագայթային, քիմիական և կենսաբանական իրավիճակի մոնիտորինգի բաժնի քիմիկ-հետախույզների խումբը: Փրկարարները հայտնաբերել են 3 անկած ձուկ: Կատարվել է նմուշառում և ուղարկվել փորձաքննության»,- նշված էր Փրկարար ծառայության հաղորդագրության մեջ:
Շրջակա միջավայրի նախարարության «Հիդրոօդերևութաբանության և մոնիթորինգի կենտրոն» ՊՈԱԿ-ը նույն օրը Վարդավառի լճում դաշտային հետազոտական աշխատանքեր և ջրի նմուշառում էր իրականացրել: Նմուշների առաջնային անալիզների նախնական արդյունքներից պարզվել էր, որ ջրում լուծված թթվածնի արժեքը շատ ցածր է և բավարար չէ ձկների կյանքի պահպանման համար։ «Ջուրը թույլ հիմնային է, հատկապես բարձր են ամոնիում (3-րդ, «միջակ» դաս) և սուլֆատ իոնների (5-րդ, «վատ» դաս) կոնցենտրացիանները»,- նշված էր հաղորդագրության մեջ:
Հունիս 10, 2023 at 13:32