ՄԱԿ-ի Կենսաբանական բազմազանության մասին կոնվենցիայի (CBD) պաշտոնական կայքում հրապարակվել է Երևանում անցկացվելիք COP17 համաժողովի մասնակցության գրանցումների, ֆինանսական աջակցության, հարակից միջոցառումների և տաղավարային տարածքների վերաբերյալ տեղեկատվությունը։
CBD քարտուղարության հրապարակած 2026-041 ծանուցմամբ մեկնարկել է մասնակիցների գրանցման և պատվիրակությունների ներկայացման գործընթացը։ Կառավարություններին, միջազգային կազմակերպություններին և դիտորդ կազմակերպություններին առաջարկվում է Կենսաբանական բազմազանության մասին կոնվենցիայի (CBD) գործադիր քարտուղարություն մինչև 2026թ․ սեպտեմբերի 15-ը ներկայացնել իրենց պատվիրակությունների տվյալները։ Միաժամանակ Կոնվենցիայի գործընթացներին կողմերի մասնակցությունը խթանող հատուկ կամավորական վստահության հիմնադրամին կատարվող ներդրումների առկայության դեպքում զարգացող երկրների, փոքր կղզիային պետությունների և անցումային տնտեսություն ունեցող երկրների ներկայացուցիչների համար նախատեսվում է նաև ֆինանսական աջակցության հնարավորություն, որի դիմումների վերջնաժամկետը հուլիսի 15-ն է։
CBD նիստերին որպես դիտորդ արդեն հավատարմագրված կազմակերպությունների ներկայացուցիչների գրանցումը կախված է CBD գործադիր քարտուղարին ուղղված պաշտոնական նամակի ստացումից, որում նշված են նրանց պատվիրակության անունները և կոնտակտային տվյալները, և հստակ նշված է այն հանդիպման կամ հանդիպումների վերնագիրը, որոնց նրանք ցանկանում են մասնակցել։ Նամակը պետք է քարտուղարություն ներկայացվի էլեկտրոնային փոստով՝ [email protected] հասցեով՝ մինչև 2026թ․ սեպտեմբերի 15-ը։
Ծանուցմամբ սահմանվել են նաև դիտորդի կարգավիճակ ստանալու պայմանները նոր կազմակերպությունների համար։ Դրանք պետք է մինչև 2026թ․ օգոստոսի 31-ը CBD քարտուղարություն ներկայացնեն պաշտոնական դիմում, կազմակերպության իրավական փաստաթղթերը և կենսաբազմազանության ոլորտում գործունեությունը հիմնավորող տեղեկություններ։
Բնիկ ժողովուրդների և տեղական համայնքների կազմակերպությունների համար ֆինանսական աջակցության դիմումների վերջնաժամկետը սահմանվել է 2026թ․ հուլիսի 1-ը։ Պատշաճ կերպով կքննարկվեն միայն բնիկ ժողովուրդների և տեղական համայնքների կողմից CBD-ին հավատարմագրված կազմակերպությունների դիմումները: Բնիկ ժողովուրդներին և տեղական համայնքներին ներկայացնող նոր կազմակերպությունները, որոնք ցանկանում են դիմել Կամավորական հիմնադրամին (VB վստահության հիմնադրամ), պետք է հավատարմագրման ընթացակարգերն ավարտեն մինչև 2026թ․ հունիսի 26-ը:
Վերը նշված հանդիպումների համար առցանց գրանցումը նախատեսվում է բացել 2026թ․ մայիսի 15-ին: Գրանցման գործընթացի վերաբերյալ լրացուցիչ մանրամասները կհրապարակվեն ավելի ուշ, իսկ մասնակիցներին խրախուսվում է գրանցվել հնարավորինս վաղ ժամկետներում։
Միաժամանակ հրապարակված 2026-042 ծանուցմամբ մեկնարկել է COP17-ի շրջանակում անցկացվելիք հարակից միջոցառումների, ցուցահանդեսային և տաղավարային տարածքների հայտագրման գործընթացը։ Հարակից միջոցառումների առցանց հայտերը կընդունվեն մինչև 2026թ․ հունիսի 30-ը։ Ըստ պաշտոնական հաղորդագրության՝ առաջնահերթությունը կտրվի մի քանի գործընկերների կողմից համատեղ կազմակերպվող միջոցառումներին։
Բացի այդ, կազմակերպություններին և երկրներին առաջարկվում է առևտրային հիմունքներով վարձակալել տաղավարային և ցուցահանդեսային տարածքներ, ինչպես նաև առանձին երկրների գրասենյակներ։ Տարածքների նկատմամբ մեծ պահանջարկի պատճառով հետաքրքրվածության հայտերը պետք է ներկայացվեն հնարավորինս շուտ, սակայն ոչ ուշ, քան 2026թ․ մայիսի 25-ը։ Հայտերի հաստատումները նախատեսվում է ավարտել մինչև հունիսի 5-ը։
CBD քարտուղարությունը նաև տեղեկացրել է, որ համաժողովի մասնակիցների համար նախատեսված տեղեկատվական ուղեցույցն արդեն հասանելի է պաշտոնական կայքում և շարունակաբար կթարմացվի նոր կազմակերպչական մանրամասներով։
Լուսանկարը գեներացված է արհեստական բանականության գործիքներով
Մայիս 11, 2026 at 14:49