ԷկոԼուր
Մարդու իրավունքների պաշտպանի գրասենյակն արձագանքել է S.O.S Խոսրով աշխատանքային խմբի գրավոր դիմումին, որով պահանջվում էր չեղյալ համարել «Գիլան» արգելավայրի ստեղծման մասին որոշումը եւ դրանով իսկ վերականգնել «Խոսրովի անտառ» պետական արգելոցի ամբողջականությունը:
Հիշեցնենք, որ դիմումը ուղարկվել էր ՀՀ նախագահին, իսկ կրկնօրինակը` ՀՀ վարչապետին, ՀՀ ԱԺ խոսնակին, ՀՀ բնապահպանության, արդարադատության նախարարներին, ՀՀ մարդու իրավունքների պաշտպանին, ՀՀ հանրային խորհրդի նախագահին, ՀՀ գլխավոր դատախազին:
Իր պատասխանում Մարդու իրավունքների պաշտպանը թվարկել է կառավարության բոլոր երեք որոշումները: Առաջին որոշումը վերաբերվում է «Խոսրովի անտառ» պետական արգելոցում բուսական եւ կենդանական աշխարհի պահպանման, վերարտադրության կայուն օգտագործման նպատակով «Գիլան» արգելավայրի ստեղծմանը: Երկրորդը նոր ստեղծված «Գիլան» արգելավայրի կանոնադրության հաստատման մասին է, իսկ երրորդը ագելավայրի տարածքի վարձակալման մասին, որով «Հովազաձոր» ընկերությանը 60 տարի ժամկետով տրվեց կառուցապատման իրավունք:
Պատասխանում արտացոլված է Բնապահպանության նախարարության դիրքորոշումը: Մասնավորապես, խոսքն այն մասին է, որ «Գիլան» արգելավայրը ստեղծելիս` օրենքներ չեն խախտվել, քանի որ հողերի կատեգորիա չի փոխվել, որ «Հովազաձոր»-ի գործունեությունը «Գիլան»-ում դադարեցված է, եւ որ իրավիճակի ուսումնասիրման համար ստեղծվել է աշխատանքային խումբ հասարակայնության ներկայացուցիչների ներգրավմամբ:
Ցավոք, օմբութսմենի գրասենյակը չի փորձել պարզել հարցը, թե ինչից էր պետք պահպանել կենդանական եւ բուսական աշխարհը (ինչպես նշված է «Գիլան»-ի ստեղծման հիմնավորման մեջ) արգելոցում, որը պահպանվող տարածքի ամենախիստ ռեժիմն ունի, թե ինչ է արել «Հովազաձոր» ընկերությունը, որը պարտավորվել է իրականացնել բուսական եւ կենդանական աշխարհի պահպանման եւ վերարտադրության ծրագիր, եւ վերջապես, ինչու այդքան դժգոհեց հասարակայնությունը, որի պատճառով ընկերության աշխատանքը ժամանակավորապես դադարեցվեց:
Փետրվար 09, 2011