2022թ. նոյեմբերի 15-ին ամփոփվեցին «Դիմակայենք կլիմայի փոփոխությանը» լրագրողական նյութերի մրցույթի արդյունքները: Երեք լավագույն աշխատանքների հեղինակներ ճանաչվեցին և պարգևատրվեցին Նունե Ավետիսյանը, Կարինե Կազարովան և Ադրինե Թորոսյանը:
Լուսանկարում՝ Նունե Ավետիսյանը, Կարինե Կազարովան և Ադրինե Թորոսյանի մենթոր Մարիամ Տաշչյանը
«Հարմարվողականության ազգային ծրագիր Հայաստանում» (ՀԱԾ) ՄԱԶԾ-ԿԿՀ ծրագրի շրջանակում Հանրային լրագրության ակումբի կողմից կազմակերպված մրցույթը նպատակ ուներ խթանել կլիմայի փոփոխության հարմարվողականության վերաբերյալ հանրային իրազեկման գործում լրագրողների և այլ ոլորտային մասնագետների մասնակցությունը: Մրցույթի մասնակից ուսանողներն ու երիտասարդ մասնագետներն իրենց հոդվածներում, տեսանյութերում, ռադիոհաղորդումներում անդրադրաձել էին Հայաստանում կլիմայի փոփոխության նկատմամբ առավել խոցելի ոլորտների խնդիրներին ու դրանց ուղղված լուծումներին:
Մրցույթի եզրափակիչ փուլ էին անցել Երևանում և մարզերում հանդես եկող լրագրողներ ու մասնագետներ՝ Սոնա Հովսեփյանը, Նունե Ավետիսյանը, Նարեկ Ալեքսանյանը, Կարինե Կազարովան, Արտեմ Ղազարյանը, Սերինե Սերոբյանը, Անգին Ծատուրյանը, Նատալյա Օսյանն ու Սոնա Խլոպուզյանը, Ադրինե Թորոսյանը և Լուսինե Գրիգորյանը: Մրցույթի ամփոփման ժամանակ մասնակիցներն առկա և առցանց ձևաչափով ներկայացրին գյուղատնտեսության, ջրային ռեսուրսների, բնական էկոհամակարգերի և զբոսաշրջության ոլորտներում կլիմայի փոփոխության ազդեցությունների և հարմարվողականությանն առնչվող ընտրված թեմաների վերաբերյալ իրենց աշխատանքները:
Մրցույթի մասնակիցների աշխատանքները համակարգել էին մենթորները՝ Մարիամ Տաշչյանը, Գեղամ Վարդանյանը, Գևորգ Թոսունյանը, Լիլիթ Հովհաննիսյանն ու Կարինե Ասատրյանը:
Լուսանկարները՝ nature-ic.am
Նոյեմբեր 16, 2022 at 15:23