«ԷկոԼուր»
Ոչ ոք չի ցանկանում պատասխանատվություն կրել Մադանի գերեզմանոցի համար, որը լցված է մկնդեղով և այլ տոքսիկ միացություններով: «Վալլեքս» ընկերությունների խումբը` ի դեմս իր «Էյ Սի Փի» դուստր ձեռնարկության, շարունակում է թափոնները լցնել Մադանի գերեզմանոց, սակայն պատասխանատվությունը դրել է իր նախկին ազգականի` «Մանես» ընկերության վրա:
Դժվար չէ հիշել Հայաստանում «Մանես-Վալլեքս» ընկերության պատմությունը, երբ այն ձեռք բերեց Ալավերդու պղնձամոլիբդենային կոմբինատը և հանքավայրը շահագործելու կոնցենսիան: Հետո ընկերությունը բաժանվեց: «Վալլեքս»-ը դարձավ ընկերությունների խումբ, բացեց դուստր ձեռնարկություններ` Ալավերդու պղնձամոլիբդենային կոմբինատը շահագործող «Էյ Սի Փի» ընկերությունը, Լեռնային Ղարաբաղում գործող «Բեյս Մետալս» ընկերությունը և, վերջապես, Թեղուտը: Իսկ «Մանես» ընկերությունը մնաց ստվերում` համեստորեն զբաղվելով «Dell» ֆիրմայի համակարգիչների ներկրմամբ:
«Մանես» ընկերությունը ոչինչ չի ձեռնարկում գերեզմանոցի անվտանգության համար: «Էյ Սի Փի» ընկերությունը ևս ոչինչ չի ձեռնարկում, քանի որ իր վրայից հանել է Մադանի գերեզմանոցի վիճակի համար պատասխանատվությունը: Ներկայումս թունավորված տարածքը ցանկապատված չէ և ոչնչով ծածկված չէ:
Գերեզմանոց լցվող թափոնները ծանր տեխնիկայով սեղմվում են` որպես սովորական աղբ: Իսկ մինչ ընկերությունները խնայում են իրենց միջոցները, Մադանի գերեզմանոցը շրջապատող տարածքներում արածում են կովերը և մոտակա գյուղերի եղջերավոր անասունները` ուտելով տոքսիկ միացություններով հագեցած խոտ: Իդեպ, Ալավերդիում վստահեցնում են, որ այդ գյուղերի կովերի միսն ալավերդցիները չեն գնում. վաճառողներին դեմքով ճանաչում են: Ասում են, որ վաճառելու համար այդ միսը տանում են ավելի հեռու, օրինակ` Երևան:
Հույսը ՀՀ արտակարգ իրավիճակների նախարարությունն է, որին դիմել է Ալավերդու Օրհուս կենտրոնի համակարգող Անուշ Էվոյանը` խնդրելով տարածքում կատարել ուսումնասիրություներ և տալ փորձագիտական գնահատական գերեզմանոցի անվտանգության միջոցառումներ մշակելու համար:
Սեպտեմբեր 09, 2009