ԷկոԼուր
Դեկտեմբերի 25-ին «ԷկոԼուր»-ն ահազանգ ստացավ, որ Փարոսի անտառում ծառահատումներ են իրականացվում: Ահազանգողը Զառա Հարոյանն էր, ով գրում էր. «Փարոսի անտառում ծառահատումներ են իրականացվում ահռելի չափերի...Իսկ ավելի կոնկրետ,Մալաթիա Սեբաստիա փողոց 82 շենքիի դիմաց: Խնդրում եմ արձագանքեք, այստեղ անտառ չի մնա»: Խնդրի առնչությամբ «ԷկոԼուր»-ը դիմեց Երեւանի քաղաքապետարան` խնդրելով տեղեկացնել, թե որքանով են օրինական ծառահատումները եւ ինչ նպատակ են հետապնդել, որքան ծառ է հատվել եւ ում է պատկանում այդ տարածքը: Ի պատասխան Երևանի քաղաքապետարանի աշխատակազմի տեղեկատվության և հասարակայնության հետ կապերի վարչությունը տեղեկացրեց, որ «քննարկվող տարածքը գտնվում է վերը նշված անտառ-պուրակին կից՝ կանաչ գոտուց դուրս և սեփականության իրավունքով պատկանում է կառուցապատող Շ. Մկրտչյանին: Աշխատակազմի բնապահպանության վարչության կողմից տրվել է թվով 3 հատ թեղի ծառատեսակի հատման թույլտվություն: Տեղազննությամբ այլ ծառերի հատման հետքեր /կոճղեր/ չեն հայտնաբերվել: Առկա են շինարարության համար օրենսդրությամբ պահանջվող փաստաթղթերը»:
Նշենք, որ տարածված լուրերի համաձայն` այդ տարածքն իրականում պատկանում է հայտնի գործարար եւ Հանրապետական կուսակցությունից ՀՀ ԱԺ պատգամավոր Սամվել Ալեքսանյանին:
Հունվար 17, 2013 at 12:35