Դալմայի հողօգտագործող`ոչ թե միայն տունս խլեցին, այլ ապրուստիս միջոցը

ԷկոԼուր

Դալմայի այգիների հողօգտագործողներն արդեն շաբաթը երկու անգամ են ՀՀ նախագահի նստավայրի մոտ  բողոքի ակցիա անցկացնում, որպեսզի նախագահ Սերժ Սարգսյանը տեսնի եւ չմոռանա իրենց խնդրի մասին: Ապրիլի 12-ին նրանք կրկին բարամյան պողոտայում էին: Նրանք իրենց բողոքը հայտնեցին ԷկոԼուրին:

«Այդ տարածքը հիմա ամայի է, այն սեփականության իրավունքով տվել են Դալմա ինվեստին: Այդտեղ գտնվել է իմ տունը, ես ապրել եմ 17 տարի: Այս 4 տարի է` քանդել են, ես տնակում եմ ապրում: Ինչ կանաչի մասին կարող է խոսք գնալ, երբ որ քանդել են տունը, ծառերս հատել են, հենց հիմա իմ տան տարածքում, որ կանաչ էր, ավտոկանգառ են սարքել: Ոչ թե միայն տունս խլեցին, այլ ապրուստիս միջոցը»,- ասաց Դալմայի հողօգտագործող, երկրորդ կարգի հաշմանդամ Մանվել Արզոյանը: «Ես հարյուր տարեկան կին եմ, իմ հողը 30 տարի մշակել եմ: Հիմա չգիտեմ` այդ հողը ում են վաճառել, վաճառված է, թե` ոչ, այդ հողը մշակեմ, թե` ոչ: Մեր հատուցումը տան, թող վերցնեն»,- ասաց Սրբուհի տատիկը:

«Իմ պահանջն է, որ իմ հողամասը ես այսքան տարի մշակել եմ, բերրիացրել եմ, չարչարվել եմ, կամ պայմանագրիս ժամկետը երկարացնեն, կամ իմ հողամասը վաճառեն, ես առնեմ»,- պահանջեց Սարգիս Գրիգորյան:

Դալմայի հողօգտագործողների խոսքերով` ոչ փոխհատուցում են տալիս, ոչ թույլ են տալիս գնել իրենց հողատարածքները, թեպետ Երեւանի քաղաքապետարանից խոստումներ եղել են: Այս կապակցությամբ «Դալմա-Սոնա» հիմնադրամի նախագահ Ռուզաննա Ղազարյանը էկոԼուրին հայտնեց. «Իրենք ասում են, որ մենք հաջողությամբ, հետեւողականորեն հասցնելու ենք փոխհատուցման գործընթացն իր ավարտին: Բայց մարդիկ դեռ սպասում են: Նրանք բավականին շատ են: Ոմանց նույնիսկ ասում են, թե դուք ինչու եք եկել. մենք ձեր հարցով չենք զբաղվելու»:

Հիշեցնենք, որ Դալմայի այգիների հողօգտագործողներն արդեն 10 տարի պայքարում են իրենց իրավունքների համար:

Ապրիլ 12, 2013 at 13:48