ԷկոԼուր
Բնապահպանության նախարար Արամ Հարությունյանը հանդիպել է Համաշխարհային բանկի հայաստանյան առաքելության բնապահապանական ավագ մասնագետ, աշխատախմբի ղեկավար Ադրիանա Դամիանովայի ղեկավարած պատվիրակությանը:
Համաշխարհային բանկը իրականացնում է «Հանքարդյունաբերության ոլորտում շրջակա միջավայրի կառավարման և թափանցիկության համար» դրամաշնորհային ծրագիրը:
Ինչպես տեղեկացնում է Բնապահպանության նախարարության տեղեկատվության եւ հասարակայնության հետ կապերի վարչությունը, կողմերը քննարկել են շրջակա միջավայրի վրա ազդեցության գնահատման արդյունքների կիրառման նպատակով մի շարք հանքարդյունաբերական համայնքների և հասարակական կազմակերպությունների հետ համատեղ գործնական ուղեցույցների մշակման, միջազգային և տեղական մակարդակով հանքարդյունաբերության գործունեության նկատմամբ բնապահպանական վերահսկողություն իրականցնելու վերաբերյալ հարցեր:
Հանդիպման ընթացքում կարևորվել է դեռևս մշակման փուլում գտնվող «Շրջակա միջավայրի վրա ազդեցության գնահատման մասին» (ՇՄԱԳ) նոր օրենքի ընդունումը: «ՇՄԱԳ նոր օրենքի նախագծի ստեղծման համար նախարարի հրամանով ստեղծվել է աշխատանքային խումբ, որտեղ լայնորեն ներգրավված են հանրային հատվածի ներկայացուցիչները: Օրենքի ներկայացման համար կա նաև համազեկուցող հանրային հատվածից»,- նշել է նախարարը և որոշակի պարզաբանումներ տվել օրենքի նախագծում առկա նոր մոտեցումների մասին:
Հունիս 07, 2013 at 14:35