Հայաստանի ամերիկյան համալսարանի (ՀԱՀ) ուսանողները մեկ նախագծով առաջարկում են կլիմայական մարտահրավերին դիմակայելու, օդի աղտոտվածությունը նվազեցնելու և քաղաքի տրանսպորտային հոսքերը թեթևացնելու երեք լուծում: Հոկտեմբերի 27-ին Երևանի քաղաքապետարանում տեղի ունեցած «Էներջի սիթի» Հաքաթոնի՝ «Լավագույն լուծումը» անվանակարգի հաղթողը ՀԱՀ-ի թիմն էր: «Լավագույն նորարարական լուծում»-ն էլ առաջարկել էր Հայաստանի ազգային պոլիտեխնիկական համալսարանի թիմը:
.jpg)
«Էներջի սիթի» Հաքաթոնին իրենց ուժերն էին փորձում նորարարներ, բիզնես մտածողություն ունեցող կրեատիվ մարդիկ, ծրագրավորման և տվյալների վերլուծության հմտություններ ունեցող երիտասարդներ, ինժեներներ, երիտասարդ գիտնականներ: Մասնակիցները, բաժանվելով 8 խմբի, 12 ժամվա ընթացքում նոր մոտեցումներ և արդիական լուծումներ էին մշակում քաղաքային կանաչ լուծումների, «կանաչ» տրանսպորտի, էներգախնայողության, վերականգնվող էներգիայի օգտագործման, աղբի կառավարման և տեղեկատվական տեխնոլոգիաները որպես «կանաչ» տնտեսության զարգացման գործիքներ դիտարկելու վերաբերյալ:
Հաղթող թիմերի հետ նախատեսվում է իրականացնել աշխատանքներ ներկայացված լուծումների զարգացման, այնուհետև նաև իրականացման ուղղությամբ:
«Հաքաթոնը հնարավորություն է երիտասարդների համար մասնակից դառնալու քաղաքի խնդիրների լուծմանը: Լավագույն լուծումներ առաջարկած թիմերը հնարավորություն և աջակցություն կստանան զարգացնելու իրենց գաղափարներն ու դրանք կիրառելու քաղաքում»,- ընդգծել էր Երևանի քաղաքապետի տեղակալ Սերգեյ Ներսեսյանը:
«Քաղաքապետարանն այսօր հաջողությամբ իրականացնում է «ԵՄ-ն՝ Երևանի համար. արևային համայնք», մանկապարտեզների վերանորոգման ծրագրերը, որոնք միտված են էներգաարդյունավետության, էներգախնայողության ու վերականգնվող էներգետիկայի ոլորտի զարգացմանը: Էներգետիկ ու կլիմայի փոփոխության հետևանքով երկրներին առաջադրվող խնդիրները մենք կարող են միասին հաղթահարել՝ գտնելով լավագույն նոր լուծումները: Կայուն էներգիայի զարգացման ծրագրերն այս առումով մեծ կարևորություն ունեն», - նշել էր Հայաստանում Եվրոպական Միության պատվիրակության համագործակցության բաժնի միջազգային օգնության-համագործակցության պատասխանատու Անդրեա Բաջջիոլին:
Միջոցառումը կազմակերպվել էր Եվրոպական միության կայուն էներգիայի շաբաթվա շրջանակում:
Նոյեմբեր 03, 2021 at 12:17