ՀՀ կառավարությունը հոկտեմբերի 28-ի նիստում որոշեց «Այգ-1» արևային ֆոտովոլտային կայանի ծրագրի շրջանակում Հայաստանի պետական հետաքրքրությունների ֆոնդի կանոնադրական կապիտալում ներդնել 822,084,793 ՀՀ դրամ արժեքով 377.4 հեկտար հողամասերը:
Հիշեցնենք, որ ՀՀ կառավարությունը դեռ 2019թ-ի դեկտեմբերի 26-ի 1922-Լ որոշմամբ դիտարկում էր հողերը վերցնել նվիրաբերության տարբերակով։
«Այգ–1» ծրագրով նախատեսվում է Արագածոտնի մարզի Դաշտադեմ և Թալին համայնքների տարածքում կառուցել 200 մեգավատ հզորությամբ արևային էլեկտրակայան: Ծրագիրն իրականացնում է Արաբական Միացյալ Էմիրությունների «Մասդար» ընկերության և «ԱՆԻՖ» կողմից ստեղծված համատեղ ընկերությունը։ Արևային կայանը նախատեսվում է շահագործման հանձնել 2025 թ-ին:
«Ծրագիրն ունի համապետական կարևոր նշանակություն և նպաստելու է Հայաստանի Հանրապետության ընդհանուր էներգետիկ հաշվեկշռում վերականգնվող էներգիայի մասնաբաժնի մեծացմանը, էներգետիկ անվտանգության բարձրացմանը, էներգետիկայի բնագավառում ներդրումների ներգրավմանը», - նշված է ՀՀ կառավարության կայքում։
«Ծրագիրը վերահաստատում է կառավարության հանձնառությունն՝ ուղղված վերականգվող էներգետիկայի զարգացմանը, ըստ որի նախատեսվում է կառուցել մինչև 1000 ՄՎտ հզորությամբ արևային կայաններ, ներառյալ ինքնավարները՝ նպատակ ունենալով մինչև 2030թ․ արևային էներգիայի արտադրության բաժինն ընդհանուրի մեջ հասցնել առնվազն 15 տոկոսի», - գրված է Հայաստանի պետական հետաքրքրությունների ֆոնդի պաշտոնական կայքում։
Հոկտեմբեր 29, 2021 at 13:38