Արաբական «Մասդար»-ը Հայաստանում վերականգնվող էներգետիկայի ոլորտում ավելացնում է իր ներկայությունը

Արաբական «Մասդար»-ը Հայաստանում վերականգնվող էներգետիկայի ոլորտում ավելացնում է իր ներկայությունը

ՀՀ նախագահ Արմեն Սարգսյանը Աբու Դաբիում հանդիպել է «Մասդար» ընկերության գլխավոր գործադիր տնօրեն Մոհամեդ Ջամիլ Ալ Ռամահիի հետ։ Ընդգծելով, որ Հայաստանի վերականգնվող էներգետիկայի ոլորտում ներկայում «Մասդար» ընկերության հետ իրականացվող 200 մեգավատտ հզորությամբ ֆոտովոլտային էլեկտրակայանի կառուցման ներդրումային ծրագիրը փոխշահավետ գործակցության առաջին քայլն է, նախագահ Սարգսյանը գոհունակություն է հայտնել ևս 200 մեգավատտ հզորության վերաբերյալ ձեռք բերած պայմանավորվածության առթիվ: Այս մասին տեղեկացնում է ՀՀ նախագահի պաշտոնական կայքը:

Արմեն Սարգսյանը նշել է, որ Հայաստանի վերականգնվող էներգետիկայի ոլորտում ընդհանուր առմամբ 400 ՄՎտ ծավալով նախագծերի իրականացումը լավ հիմք է ստեղծում ավելի լայն գործակցության համար և կարևոր քայլ է մեր երկրի էներգետիկ համակարգի դիվերսիֆիկացման ուղղությամբ: «Ակնկալում եմ, որ այս ծրագրով հիմք կստեղծվի երկարատև համագործակցության համար», - ասել է նախագահ Սարգսյանը:

Նա գոհունակություն է հայտնել նաև «Այգ-1» ծրագրի իրականացման շուրջ «Մասդար» ընկերության և Հայաստանի պետական հետաքրքրությունների ֆոնդի արդյունավետ համագործակցության վերաբերյալ։ Հանդիպմանը զրուցակիցները խոսել են նաև Հայաստանում հողմային էներգետիկայի ոլորտում նույնպես մեծածավալ ներդրումներ կատարելու հնարավորությունների մասին:

Նշենք, որ «Մասդար»-ը և «Հայաստանի պետական հետաքրքրությունների ֆոնդ» ՓԲԸ-ն 2019թ-ին նախաձեռնել են «ՄԱՍԴԱՐ ԱՐՄԵՆԻԱ ԾՐԱԳԻՐ»-ը, որի շրջանակներում նախատեսվում է ՀՀ Արագածոտնի և Կոտայքի մարզերում կառուցել արդյունաբերական մասշտաբի ընդհանուր 400 ՄՎտ հզորությամբ 2 արևային ֆոտովոլտային կայան: Կայանների կառուցման և շահագործման համար նախատեսվում է հիմնադրել համատեղ ընկերություն, որտեղ «Հայաստանի պետական հետաքրքրությունների ֆոնդ» ՓԲԸ-ն ունենալու է 15% բաժնեմասնակցություն, իսկ Masdar-ը՝ 85%: 

Հունվար 17, 2022 at 15:22


Առնչվող նյութեր


Կատեգորիա

ավելին
պակաս

Մարզեր